خلیلزاد اسلام‌اباد کې د نجونو زده‌کړو په اړه غونډه د ا.ا پر وړاندې تبلیغاتي هڅه بللې ده

کابل (پژواک، ۲۲ مرغومی ۱۴۰۳): د افغان سولې لپاره د امریکا پخوانی ځانګړی استازی وایي، پاکستان کې د نجونو پر زده‌کړو د اسلامي همکاریو سازمان د غونډې موخه له افغان ښځو سره خواخوږي نه، بلکې له ا.ا سره د روانې تبلیغاتي جګړې یوه برخه ده.

د اسلامي همکاریو سازمان نن او سبا په اسلام‌اباد کې د «په مسلمانو ټولنو کې د نجونو زده‌کړې، چلېنجونه او فرصتونه» تر سرلیک لاندې غونډه جوړوي او د پاکستان د پوهنې او روزنې وزیر خالد مقبول صدیقي تېره ورځ ویلي وو چې اسلامي امارت ته یې هم په دغه غونده کې د ګډون بلنه ورکړې ده.

د افغانستان د سولې لپاره د امریکا پخواني ځانګړي استازي زلمي خلیلزاد پر خپله اېکس‌پاڼه لیکلي، دغه غونډه پاکستان تنظیم کړې ده.

دی زیاتوي: «څرګنده ده چې دا د افغان ښځو لپاره د ریښتینې اندېښنې له مخې نه، بلکې له طالبانو سره د روانې جګړې برخه ده. خو ځیني وختونه، حتی ستا دښمن کولی شي چې تا ته یوه ګټه ورسوي.»

هغه په افغانستان کې د نجونو د زده‌کړو پر ځنډولو نیوکه کړې او وایي چې دا پر افغانانو پورې اړه لري چې دغه ستونزه حل کړي.

دا په داسې حال کې ده چې څه باندې درې کاله مخکې د اسلامي امارت له بیا واکمنېدو وروسته له شپږم ټولګي پورته ښوونځیو کې او له هغه یو کال وروسته پوهنتونونو کې د نجونو زده‌کړې وځنډول شوې.

په کور دننه او بهر له اسلامي امارته غوښتل شوي چې د نجونو پر زده‌کړو لګول شوی بندیز لرې کړي، خو چارواکو ویلي، هڅې روانې دي چې د مناسب چاپېریال په رامنځته کېدو سره د نجونو زده‌کړو ته اجازه ورکړل شي.