<p style="text-align: justify;">کابل (پژواک، د سلواغې لومړۍ نېټه ۱۴۰۴): د چاپېریالساتنې ملي ادارې رییس د سره صلیب او سرې میاشتې ټولنې نړۍوال فدراسیون له استازو سره په لیدنه کې ویلي چې یاده ادارې دې د چاپېریالساتنې، کرنې، مالدارۍ او د اوبو مدیریت برخو کې له افغانستان سره همکاري وکړي.</p>
<p style="text-align: justify;">د چاپېریالساتنې ملي ادارې خبرپاڼه کې راغلي چې د دې ادارې رییس مولوي مطیعالحق خالص د سره صلیب او سرې میاشتې ټولنې نړۍوال فدراسیون (IFRC) د اسیا پاسیفیک برخي له رییس الکساندر مټیو او د افغانستان لپاره د (IFRC) له مسوول ډاکټر حسام فیصل سره وکتل.</p>
<p style="text-align: justify;">خالص ویلي، افغانستان د وچکالۍ له امله ډېر زیانمن شوی؛ طبیعي یخچالونه یې مخ پر ویلې کېدو دي، د ځمکې لاندې اوبه کمې شوې او د کرنې او مالدارۍ سکټورونه سخت زیانمن شوي دي.</p>
<p style="text-align: justify;">د هغه په خبره، په ډېرو ولایتونو کې خلک د خپلو مېنو او کورونو پرېښودو ته اړ شوي، په یو شمېرو ولایتونو کې خلک ان د خپلو څارویو لپاره اوبه په بیه اخلي.</p>
<p style="text-align: justify;">هغه دغهراز ویلي، د کډوالو ستونزې هم د اندېښنې وړ دي او که په دې برخو کې نړۍوالي مرستې ونه شي، وضعیت به نور هم خراب شي.</p>
<p style="text-align: justify;">نوموړي ټینګار کړی چې بشري موضوعاتو ته باید په نړۍواله کچه پاملرنه وشي او د سره صلیب او سرې میاشتې نړۍوال فدراسیون (IFRC) له مسوولینو یې غوښتنه کړې چې د چاپېریالي ستونزو، کرنې او مالدارۍ او د اوبو مدیریت برخو کې دې همکاري وکړي.</p>
<p style="text-align: justify;">د سره صلیب نړۍوال فدراسیون (IFRC) د اسیا پاسیفیک برخي مشر الکساندر مټیو ویلي: «افغانستان ته زما د سفر موخه همدا ده چې د کډوالو، زلزلهځپلو ستونزې له نږدې وګورم او همداراز غوښتل مې چې د افغانستان د چاپېریالي وضعیت په هکله هم معلومات ولرم. موږ به خپلو هڅو ته دوام ورکړو او کوښښ به وکړو چې په نړۍواله کچه د افغانستان لپاره د مرستو راجلبولو زمینه مساعده شي.»</p>
<p style="text-align: justify;">په خبرپاڼه کې راغلي، د افغانستان لپاره د (IFRC) مسوول، ډاکټر حسام فیصل ته سپارښتنه وکړه چې د چاپېریالساتنې له ملي ادارې سره خپلو ګډو او نږدې همکاریو ته دوام ورکړي.</p>
