کابل ښار (پژواک ٢٩ دلو ٩٠): د ٢٠١٢ لندن اولمپيک په سيالو کې يواځينۍ ګډون کوونکې افغانه نجلۍ د سوک وهلو په څانګه کې د زيات چمتووالي لپاره نن لندن ته روانه شوه.
د اولمپيک ملي کمېټې د خپرونو رييس محمد عارف پيمان وايي، چې دغه نجلۍ صدف رحيمي نومېږي او په ٥٤ کيلوګرامه وزن کې يواځينۍ افغان سوک وهونکې ده، چې د سوک وهلو د نړيوال فدراسيون په بلنه د مسلکي زده کړو لپاره د انګلستان مرکز لندن ته تللې ده.
پيمان پژواک خبري اژانس ته وويل، چې رحيمي د ٢٠ ورځو لپاره په يوه روزنيز کمپ کې د بهرنيو روزونکو تر نظر لاندې په دې سياليو کې د ګډون لپاره چمتووالى نيسي.
هغه زياته کړه چې دغه ځوانه ورزشکاره، له پنځو کلونو راهيسې د سوک وهلو په برخه کې فعاليت کوي او په روان کال کې يې په تاجکستان کې په نړيوالو سياليو کې ګډون کړى او د سرو زرو مډال يې ترلاسه کړى دى.
د اولمپيک ملي کمېټې د خپرونو رييس د معلوماتو له مخې، د لندن د اولمپيک په سياليو کې به افغان ورزشکاران د تکواندو او اتلتيک په رشتو کې هم ګډون وکړي.
نثار احمد بهاوي او روح الله نېکپا به د تکواندو او مسعود عزيزي به د اتلتيک په رشته کې د افغانستان په استازيتوب لوبې وکړي.
ټاکل شوې ده، چې دغه سيالۍ د روان زېږديز کال د جولاى په مياشت کې په لندن کې ترسره شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن