کابل (پژواک ١٨ غويى ٩١): د امريکا د بهرنيو چارو وزيره مېرمن هيلري کلنټن وايي، چې د القاعدې نوى مشر ايمن الظواهري په پاکستان کې پټ دى.
مېرمن کلنټن دغه څرګندونې هندوستان ته د رسمي سفر پر مهال نن (د غويي ١٨مه) د دغه هېواد په کلکته ښار کې د يوې مرکې پر مهال کړې دي.
نوموړې پرون دغه هېواد ته په رسمي سفر راغلې، څو له هندوستان سره د ستراتيژيکو اړيکو په اړه خبرې وکړي.
هغې زياته کړه، چې هېواد يې د القاعده ډلې د فلج کولو هڅې پيل کړې او په دې برخه کې تر ډېره بريالي شوي هم دي.
مېرمن کلنټن ويلي: ((د القاعدې ګڼ شمېر مهم مشران د تېښتې په حال کې دي، ايمن الظواهري چې د اسامه بن لادن ځاى ناستى ټاکل شوى، موږ په دې پوهېږو، چې هغه په پاکستان کې پټ دى.))
د نوموړې په وينا، دوى به د الظواهري ترڅنګ د هغه د کسانو په لټه کې هم وي، چې غواړي القاعده متحرکه او فعاله وساتي.
د يادونې ده، چې له دې مخکې د امريکا د دفاع وزير ليون پنيټا هم ويلي وو، چې د القاعدې مشر ايمن الظواهري د پاکستان په لوېديځه برخه قبايلي سيمو کې دى.
خو د پاکستان د پوځ د عامه اړيکو دفتر له امريکا غوښتي وو، چې په دې اړه دې ورسره استخباراتي معلومات شريک کړي، څو يې پر ضد عمليات ترسره کړي.
د القاعدې پخوانى مشر اسامه بن لادن تېر کال په همدې مياشت کې د پاکستان په ايبټ اباد ښار کې په داسې حال کې د امريکايي ځواکونو له خوا ووژل شو، چې پاکستان په پرله پسې توګه په خپله خاوره کې د هغه له شتونه انکار کړى و.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن