ملا عبدالغني برادر: ا.ا په ټاکلي وخت د قوش‌تېپې کانال د چارو بشپړولو ته ژمن دی

<p style="text-align: justify;">کابل (پژواک، ۹ وږی ۱۴۰۳): د ریاست‌الوزراء اقتصادي مرستیال د قوش‌تېپې کانال د سربند له چارو څخه د لیدنې پر مهال ویلي، اسلامي امارت په ټاکلي وخت کې د دغه کانال د چارو بشپړولو ته ژمن دی.</p>

<p style="text-align: justify;">په بلخ ولایت کې د قوش‌تېپې د اوبو لګولو دغه ستره پروژه – چې د امکان سنجۍ مطالعات یې په ۲۰۱۸ کال کې پیل شوي وو- د سیمې په کچه د اوبو لګولو ستره پروژه ګڼل کېږي.</p>

<p style="text-align: justify;">د دې پروژې کار د روان کال د وري په لسمه پیل شوی او ٦٠ ميليارده افغانۍ لګښت لري.</p>

<p style="text-align: justify;">د راپورونو له مخې، دغه کانال – چې ۲۸۰ کیلومتره اوږدوالی، ۱۰۰ متره پلنوالی او ۸ اعشاریه ۵ متره ژوروالی لري – د امو له سینده په کال کې لس میلیارد متر مکعبه اوبه رابېلوي او د بلخ، جوزجان او فاریاب ولایتونو شاوخوا ۵۰۰ زره هکټاره ځمکه خړوبولای شي.</p>

<p style="text-align: justify;">د رياست‌الوزراء اقتصادي معاونیت په خبرپاڼه کې راغلي چې د ریاست‌الوزراء اقتصادي مرستیال ملا عبدالغني برادر د قوش‌تېپې کانال د سربند له چارو ليدنه وکړه.</p>

<p style="text-align: justify;">سرچینې لیکلي چې ملا برادر د ملي پراختيا شرکت کارکوونکو ته هدايت ورکړ چې د سربند او کانال چارې په پوره دقت او ښه ډول په ټاکلې نېټه بشپړې کړي.</p>

<p style="text-align: justify;">خبرپاڼه کې راغلي چې د رياست‌الوزراء اقتصادي مرستيال د قوش‌تېپې کانال د کرنې او اوبو مديريت برخه کې مهم وباله او ويې ويل، اسلامي امارت يې په خپل ټول توان سره په ټاکلي وخت د چارو بشپړولو ته ژمن دى.</p>

<p style="text-align: justify;">د يادونې ده، اوسمهال د دغه ملي کانال د سربند جوړولو او همدا راز د دویم فاز چارې په ښه ډول د افغان انجنيرانو له لوري روانې دي چې زرګونو کسانو ته په‌کې کاري فرصتونه برابر شوي دي.</p>

<p style="text-align: justify;"></p>

<p style="text-align: justify;"></p>