هرات (پژواک، د تلې لومړۍ نېټه ٩٢): د هرات په محبس کې سلګونه سياسي بنديانو د نه خوړو اعتصاب کړى او يو شمېر پوليس يې هم له ځان سره بنديان کړي دي.
د ولايتي شورا غړي تورمحمد ظريفي د تلې په لومړۍ پژواک ته وويل، چې په دغه اعتصاب کې تر څلور سوه زيات سياسي بنديان برخه لري.
د نوموړي په وينا، بنديان غوښتنه کوي، چې د ولسمشر د وروستي فرمان له مخې بايد له بنده خوشې شي او هم دې به محبس کې د ژوند مناسب شرايط ورته برابر شي.
د ظريفي په وينا، د هرات د محبس د بنديانو خونې تنګي دي او اوسمهال په درې کسيزه کوټه کې لس تنه اوسېږي.
د ده په وينا، بنديانو پرون اعتصاب پيل کړى، د لومړي او شپږم بلاک واک يې اخيستى او يو شمېر پوليس يې هم له ځان سره بنديان کړي دي.
د هرات د امنيه قوماندانۍ وياند سمونوال عبدالروف احمدي له دې پېښې ناخبري ښيي.
د هرات د سولې شورا د دفتر رييس مولوي غلام سرور هم ومنله، چې بنديانو اعتصاب کړى خو له دې يې ناخبري وښوده، چې ولې يې اعتصاب کړى دى.
د سولې شورا مشر وايي، د حالت د معلومولو لپاره يې محبس ته پلاوى استولى تر څو له چارواکو سره په ګډه ستونزې ته د حل يوه لاره پيدا کړي.
د هرات په محبس کې اوسمهال شاوخوا ٣٠٠٠ کسه پر بېلابېلو جرمونو تورن بنديان شته، چې ١٥٠ تنه يې مېرمنې دي.
په دې وروستيو کې د فراه ولايت په محبس کې هم بنديانو اعتصاب کړى و، دوى تور لګاوه، چې ناوړه چلند ورسره کېږي او دوسيې يې ځنډول کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن