مولوي عبدالکبیر: اسلامي امارت د افغانستان د پرمختګ پر وړاندې خنډونه له منځه وړي

<p style="text-align: justify;">خوست ښار (پژواک، ۹ سلواغه ۱۴۰۳): د کډوالو او راستنېدونکو چارو وزارت سرپرست وايي چې اسلامي امارت د افغانستان د پرمختګ پر وړاندې خنډونه له منځه وړي او نړۍ هم درک کړې چې اوسنی نظام د افغانانو ښه استازولي کولای شي.</p>

<p style="text-align: justify;">دغه څرګندونې د کډوالو او راستنېدونکو چارو سرپرست وزير مولوي عبدالکبیر په خوست کې د نیازي قوم له یو شمېر ديني عالمانو او قومي مشرانو سره په لیدنه کې کړې دي.</p>

<p style="text-align: justify;">د خوست ولایت مقام څخه په دې اړه خپره شوې خبرپاڼه کې راغلي چې په راټولیدنه کې، د نیازي قوم مخورو او علماوو د یو لړ مسایلو په هکله خپلې مشورې او نظرونه له وزير سره شریک کړل او د اسلامي امارت د مشرانو لخوا یې د خلکو د غږ اورېدو له امله خوښي څرګنده کړه.</p>

<p style="text-align: justify;">خبرپاڼه کې راغلي سرپرست وزير د وینا پرمهال د خلکو غږ اورېدل د حکومت مسوولیت یاد کړ او ويې ویل، په تېره جهادي دوره کې د خوست ولس د خورا ډېرو تکلیفونو په ګاللو او قربانیو په ورکولو سره د اسلامي نظام په راتګ کې مهمه ونډه لرلې.</p>

<p style="text-align: justify;">د خبرپاڼې له مخې، مولوي عبدالکبیر زیاته کړه چې اسلامي امارت د علماوو او قومي مشرانو سلامشورو ته اړتیا لري او اسلامي نظام خپلې چارې د ولس په مشوره مخ ته وړي.</p>

<p style="text-align: justify;">د هغه په وینا، اسلامي امارت د افغانستان د پرمختګ پر وړاندې خنډونه له منځه وړي او نړۍ هم پوهېدلې چې اسلامي امارت د افغانانو ښه استازولي کولای شي.</p>

<p style="text-align: justify;"></p>