بروکسل ( پژواک ٥ کب ٩٢ ) : ټاکل شوې ده، چې د روانې اونۍ په وروستيو کې د ناټو دفاع وزيران د افغانستان د وروستيو حالاتو په اړه خبرې وکړې.
د ناټو د دفاع وزيرانو دوه ورځنۍ غونډې ټاکل شوې ده ، چې د چهارشنبې په ورځ د کب په ٧مه، د بلجيم په پلازمېنه بروکسل کې چېرته چې د ناټو سازمان مقر دى، پيل شي.
په بروکسل کې د ناټو يوې سرچينې د کب په ٥ مه، پژواک خبري اژانس ته وويل ، چې په دې غونډه کې به د ناټو او ايساف هېوادونو ددفاع وزيرانو ترڅنګ په افغانستان کې د ايساف ځواکونو لوى قوماندان جنرال جوزېف ډنفورډ هم ګډون وکړي.
سرچينې دغه راز وويل ، چې په دې غونډه کې به د افغانستان دفاع وزير جنرال بسم الله خان محمدي هم ګډون وکړي.
د افغانستان دفاع وزارت وياند جنرال ظاهر عظيمي پژواک ته وويل، چې د ناټو ددفاع وزيرانو په غونډه کې دافغانستان دفاع وزير جنرال بسم الله محمدي ګډون هم په پلان کې شته،خو نور جزييات يې ورنکړل.
د ناټو ددفاع وزيرانو د غونډې په لومړۍ ورځ به د ناټو پر اړوندو موضوعاتو خبرې کېږي او په دويمه ورځ به د ناټو او ايساف ددفاع وزيران د افغانستان په اړه خبرې کوي.
په بروکسل کې د ناټوسرچينې وايي، چې په دې غونډه کې به دافغان ځواکونو روزنې، دامنيتي مسوولينو دلېږد او کېداى شي د افغانستان د راتلونکو ټاکنو په اړه هم خبرې وشي.
ددې غونډې د پوښښ لپاره د پژواک په ګډون د يو شمېر افغاني رسنيو خبريالان هم په بروکسل کې دي او ټاکل شوې ده، چې د ناټو سرمنشي اڼدرس فوغ راسموسن او يو شمېر نور چارواکي له افغان ژورنالېستانو سره ځانګړې غونډې هم ولري.
دغه غونډه په داسې حال کې جوړېږي، چې د افغانستان او ناټو سازمان ترمنځ د (صوفه) سند په اړه خبرې اترې پيل شوې دي.
ددې سند له مخې، تر ٢٠١٤ کال وروسته په افغانستان کې د پاتې کېدونکو ناټو سرتېرو دريځ څرګنديږي .
ولسمشر حامد کرزي د هېواد د ملي امنيت شورا ته دنده سپارلې، چې ناټو سره ژر تر ژره ددې سند په اړه يوې پرېکړې ته ورسيږي.
خو ناټو اعلان کړى، څو پورې چې د کابل او واشنګټن ترمنځ امنيتي سند لاسليک نه شي، دوى به هم د صوفه سند لاسليک نه کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن