اسعداباد (پژواک ٨ زمرى ۹٣): د کونړ امنيتي چارواکي وايي چې د ډيورنډ کرښې له پورې غاړې د پاکستاني پوځ له لوري د دغه ولايت پر دانګام ولسوالۍ ٣٢ توغندي را توغول شوي او خلک يې اندېښمن کړي دي.
د کونړ امنيه قوماندان مل پاسوال عبدالحبيب سيدخېلي نن له غرمې وروسته پژواک خبري اژانس ته وويل چې دا توغندي له پرون راهيسې تر نن سهار اته بجې پورې د دانګام ولسوالۍ پر لويه ګوريګه، وړه ګوريګه او خاره سيمو لګېدلي دي.
سيدخېلي وايي، چې د دغو توغنديو د لګېدو له امله خلکو ته مرګ ژوبله نه ده اوښتې، خو ځينو کرنيزو ځمکو ته يې زيان اړولى دى.
هغه زياته کړه: ((پاکستان په اختر کې هم توغندي را وتوغول، د سيمې خلک يې اندېښمن کړي او په دې اختر کې يې هم ارام پرې نه ښودل.))
د کونړ امنيه قوماندان په دې اړه چې ايا تاسو به د دغو بريدونو پر وړاندې په ورته اقدام لاس پورې کړئ؟ وويل، چې د ډيورنډ کرښې ها خوا هم بېګناه خلک اوسېږي او نه غواړي چې هغوى زيانمن شي، پاکستاني پوځيان مسوول دي او افغانستان غواړي چې ستونزه د خبرو اترو له لارې حل شي.
د دانګام يو قومي مشر مزمل د پاکستان د توغندويي بريدونو په غندلو سره وويل چې د کونړ خلک نور له جګړې ستړي شوي او تر اوسه د يادې ولسوالۍ يو شمېر خلکو ته د پاکستان په بريدونو کې مرګ ژوبله اوښتې ده.
دغه قومي مشر له دولت څخه په کلکه غوښتنه وکړه، چې د دغو بريدونو د مخنيوي لپاره دې ژر تر ژره د حل يوه لاره پيدا کړي.
د اختر په لومړۍ ورځ کې د ډيورنډ کرښې له پورې غاړې د پاکستاني پوځ له لوري پر دانګام، شيګل او مرورې ولسواليو کې هم ٧١ توغندي را وتوغول شول، چې په کې يو ١٢ کلن ماشوم ووژل شو او د سيمې خلک يې نور هم زيانمن کړل.
د يادونې ده، د سږ کال له پيله راهيسې د کونړ پر سرحدي ولسواليو په ورته بريدونو کې اته تنه وژل شوي، ٥٣ ته ټپيان، ٣٢ کورونه ويجاړ شوي، ٣٠٠ څاروي له منځه تللي او ٤٥٠ کورنۍ بېځايه شوې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن