<p style="text-align: justify;">کابل (پژواک، ۲۱ وږی ۱۴۰۳): پوهنې وزارت وایي، تېر کال هېواد کې ۳۱۶ نوي ښوونځي او څه باندې ۲۱۰۰۰ مدرسې او د اسلامي زدهکړو مرکزونه جوړ شوي، څه باندې ۱۶ میلیون ټوکه کتابونه ښوونځیو او نږدې یو میلیون ټوکه نور د اسلامي زدهکړو مرکزونو ته چاپ شوي دي.</p>
<p style="text-align: justify;">د یاد وزارت د اسلامي زدهکړو مرستیال مولوي کرامتالله اخندزاده نن په کابل کې د حکومت د اطلاعاتو او رسنیو مرکز کې د دولتي ادارو د یو کلنو لاستهراوړنو تشریح پروګرام کې د دغه وزارت د یو کلنو کړنو راپور وړاندې کړ.</p>
<p style="text-align: justify;">هغه وویل چې تېر کال دولتي او خصوصي ښوونځیو ته نږدې ۱.۵ میلیونه نوي زدهکوونکي جذب شوي، چې په دې سره په دولتي او خصوصي ښوونځیو کې د زدهکوونکو شمېر څه باندې ۱۰ میلیونه او ۹۱۴ زرو ته رسېدلی دی.</p>
<p style="text-align: justify;">ده زیاته کړه چې په یاده موده کې د هېواد په کچه ۱۰۶ دولتي او ۲۱۰ خصوصي ښوونځي نوي تاسیس شوي چې په دې سره د دولتي او خصوصي ښوونځیو ټولیز شمېر ۱۸۳۳۷ ښوونځيو ته لوړ شوی دی.</p>
<p style="text-align: justify;">د ده په وینا، تېر کال ۱۲۳ ښوونځي او ۱۵۹ محلي ټولګي د کوچیانو ماشومانو ته ځانګړي شوي چې اوسمهال په کې نږدې ۴۲ زره ماشومان پر زدهکړو بوخت دي.</p>
<p style="text-align: justify;">مولوي کرامتالله اخندزاده وویل: «تېر کال، له لومړي څخه تر دوولسم ټولګي پورې ۱۶ میلیونه ۱۸۸ زره او ۹۳۹ ټوکه درسي کتابونه، د اسلامي زدهکړو د مرکزونو لپاره مو ۶۱۷ زره او ۹۷۸ ټوکه درسي کتابونه او د سواد زدهکړې ۲۹۴ زره او ۶۴۱ ټوکه کتابونه مو چاپ کړي او وېشلي مو دي.»</p>
<p style="text-align: justify;">هغه زیاته کړه: «تېر کال للهالحمد، د هېواد په کچه د ۱۹۶۶۹ مدرسو، ۱۲۷۷ دارالحفاظونو، ۱۱۵ دارالعلومونو او ۳۹ دارالایتامونو په ګډون د اسلامي زدهکړو ۲۱۲۵۷ مرکزونه جوړ شوي چې درې میلیونه ۶۸۷ زره او ۲۰۰ تنه په کې پر اسلامي زدهکړو بوخت دي.»</p>
<p style="text-align: justify;">د ده په وینا، د دوولسم ټولګي فارغانو ته ۳۰۳ زره شهادتنامې وېشل شوې دي، د ۲.۹ میلیون فارغانو نتایج په الکترونیکي سيسټم کې ثبت شوي، د ښوونځیو، مدرسو او اداري دفترونو د جوړولو لپاره ۸۰۴ جریبه ځمکه تدارک شوې، په ولایتونو کې ۶۵۰ ښوونځيو او مدرسو ته ودانۍ جوړې او د ۱۵۰۰ نورو ښوونځيو او مدرسو ودانۍ ترمیم شوې دي.</p>
<p style="text-align: justify;">د پوهنې وزارت د اسلامي زدهکړو مرستیال وویل چې په ښوونیزو بنسټونو کې د ازموینو کیفیت د ښهوالي په موخه، د معیاري ازموینو بورډ او د معیاري پوښتنو بانک رامنځته شوی، د پوهنې قانون مسوده چمتو شوې، د مدرسو د تاسیس او د جهادي مدرسو رامنځته کولو قوانین نافذ شوي او د لا زیاتو همکاریو د جلبولو په موخه له کورنیو او بهرنیو بنسټونو سره د همکارۍ ۱۹ هوکړهلیکونه لاسلیک شوي دي.</p>
<p style="text-align: justify;">هغه زیاته کړه چې دغه وزارت سږ کال په پام کې لري چې یو میلیون زدهکوونکي جذب، ۱۵۰ ښوونځي او ۱۵ زره د اسلامي تعلیماتو نوي مراکز ایجاد، کلیوالو مدرسو ته لس میلیون کتابونه چاپ او د اسلامي تعلیماتو په مراکزو کې ۳۰ زره بستونه ایجاد کړي.</p>
<p style="text-align: justify;">د پوهنې وزارت ویاند قاري منصوراحمد حمزه، له شپږم ټولګي پورته د نجونو د ښوونځيو د بيا پرانیستې په اړه د پژواک خبري اژانس د پوښتنې په ځواب کې وویل: «په دې هکله باندې مرکزي ویاند صاحب، مجاهد مولوي صیب بار بار وضاحت ورکړی، موږ هم پر هغو اکتفا کوو او تر امر ثاني پورې به معطل وي.»</p>
<p style="text-align: justify;">د ۱۴۰۱ د وري میاشتې په لومړیو کې ښوونیز کال پیل؛ د افغانستان سرپرست حکومت په هماغه ورځ د نجونو منځنیو ښوونځیو او لېسو زدهکړې او د همدغه کال په مرغومي مياشت کې د نجونو لوړې زدهکړې تر امر ثاني پورې وځنډولې.</p>
<p style="text-align: justify;">د اسلامي امارت چارواکو ویلي چې د نجونو زدهکړې په موقتي ډول ځنډول شوې دي او د شرایطو په برابرېدو سره به پیل شي.</p>
