خوست ښار ( پژواک، د کب لومړۍ ۹۳ ) : د پکتیا ولایت د ملي امنیت یوه افسر د نامعلومو وسلوالو په یوه برید کې ووژل شو.
د پکتیا مرستیال والي عبدالولي سهي د کب په لومړۍ نیټه، پژواک خبري اژانس ته وویل چې دا پيښه نن ماښام په شاوخوا پنځو بجو رامنځته شوې ده.
هغه زیاته کړه چې نامعلومو وسلوالو په ګردیز ښار کې د دې ولایت د ملي امنیت ریاست پر کدري مرستیال ډګروال احمدشاه ګردیزي د هغه د کور مخې ته ډزې کړي او هغه یې وژلی دی.
د نوموړي په وینا، په دې برید کې د ګردیزي زوی ټپي شوی او بریدګر په موټر کې تښتیدلي دي.
د ولایت مرستیال وویل چې پولیسو په دې اړه پلټنې پیل کړې دي.
ددې برید مسوولیت تر اوسه چا په غاړه نه دی اخیستی.
