ترکيه کې د افغان سولې په اړه غونډه جوړېږي

کابل (پژواک، ٢٧ کب ٩٣): ټاکل شوې چې په نږدې راتلونکي کې په ترکيه کې د افغانستان د سولې په اړه غونډه جوړه شي.

دا غونډه په فرانسه کې د سولې د څېړنيز مرکز له خوا پلان شوې ده چې تر دې مخکې يې په پاريس او دوبۍ کې هم دا ډول غونډې کړې دي.

د غونډې جوړوونکو ته يوې نږدې سرچينې د کب په ٢٧مه پژواک خبري اژانس ته وويل چې پرون يې مخکني ولسمشر حامد کرزي ته په دې غونډه کې د ګډون بلنه ورکړې ده.

سرچينې زياته کړې چې په غونډه کې د افغانستان د بېلابېلو سياسي ګوندونو او وسله والو طالبانو استازو او حکومتي غړو ته هم بلنه ورکړل شوې ده.

د افغانستان د ملي شورا يوه غړي چې په دې غونډه کې ورته بلنه ورکړل شوې، د نوم له اخيستو پرته پژواک اژانس ته وويل چې د ولسمشرۍ پخوانى کانديد او د حزب اسلامي غړى قطب الدين هلال، د ولسمشرۍ مخکنى لومړى مرستيال يونس قانوني، حاجي روح الله، مولوي شهزاده، ملا ضعيف او يو شمېر نورو کسانو ته بلنه ورکړل شوې ده.

د ولسمشر اشرف غني وياند اجمل عابدي له پژواک اژانس سره په خبرو کې له دې غونډې بې خبري وښوده او دا يې يوه شايعه وبلله.