کابل (پژواک، ٢٨ مرغومى ٩٤): استراليا وايي چې د افغانستان خلک د ترهګرو ډلو له خوا تپل شوې جګړې او تاوتريخوالي زيانمن کړي او هېواد يې خپلو مرستو ته دوام ورکوي.
د ارګ له مطبوعاتي دفتره پژواک خبري اژانس ته په را استول شوې خبرپاڼه کې راغلي چې د استراليا لومړي وزير ملکم ترنبل له ولسمشر غني سره په ارګ کې وليدل او دواړو د خپلو هېوادونو ترمنځ د اړيکو پر پراختيا، په افغانستان کې له ترهګرۍ سره پر مبارزې، د سولې پروسې، بشري حقونو په ځانګړي ډول د ښځو په اړه بحث او خبرې وکړې.
ولسمشر غني په بېلابېلو برخو کې له افغانستان سره د استراليا له مرستو او د هغه هېواد د مالي مرستو له دوامه مننه وکړه او په افغانستان کې يې د ٤١ استراليايي سرتېرو قرباني وستايله.
هغه د استراليا له لومړي وزير غوښتنه وکړه چې له افغان هوايي ځواکونو سره د تخنيکي وسايلو په ساتنه کې مرسته وکړي.
د استراليا لومړى وزير چې د يوه لوړ پوړي پلاوي په مشرۍ کابل ته راغلي و، د خپل هېواد د پوځي ځواکونو قوماندان مارشال مارک بنکسين ته يې لارښوونه وکړه چې په دې برخه کې د همکارۍ د امکاناتو چاره و ارزوي.
ولسمشر غني له استراليا غوښتنه وکړه چې په هېواد کې يې د کانونو په برخه کې پانګونه وکړي او د اوبو د مديريت په برخه کې دې له افغانستان سره تخنيکي مرستې وکړي.
د استراليا لومړي وزير وويل چې په افغانستان کې به د خپلو ځواکونو شمېر ٢٧٠ تنو ته لوړ کړي، څو د افغان ملي پوليسو او اردو سره په کابل کې د امنيت په خوندي کولو کې همکاري وکړي.
هغه يو ځل بيا په پراختيايي برخه کې له افغانستانه د خپل هېواد پر ملاتړ ټينګار وکړ.
د استراليا لومړي وزير ولسمشر غني ته بلنه ورکړه چې استراليا ته سفر وکړي چې ولسمشر يې بلنه ومنله او څرګنده يې کړه چې د راتلونکي کال په اوړي کې به استراليا ته سفر وکړي.
د استراليا لومړي وزير د حکومت د اجرايي رييس ډاکټر عبدالله عبدالله سره هم په خپله ليدنه کې په افغانستان کې د امنيت او ثبات لپاره د مبارزې او همکارۍ پر لارو چارو خبرې وکړې او د سولې په برخه کې يې د همکاريو د ژمنې تر څنګ له وسله والو مخالفينو سره پر ګډې مبارزې ټينګار وکړ.
عبدالله د افغان حکومت د اقتصادي پروګرامونو او دواړو هېوادونو ترمنځ د همکارۍ په اړه خبرې وکړې او ويې ويل چې استراليا کولى شي له افغانستان په پوځي برخه، ظرفيت لوړونې، د کانونو د کشف او ورڅخه ګټه اخيستنې ، سوداګرۍ او پانګونې په برخو کې همکاري وکړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن