کندهار (پژواک ١٨ لړم ٩٥): د کندهار چارواکي وايي، د ماين چاودنو له امله په ارغستان ولسوالۍ کې دوه ملکي وګړي وژل شوي او په سپين بولدک ولسوالۍ کې دوه پوليس ټپيان دي.
د ارغستان پېښه نن مازيګر ناوخته د دې ولسوالۍ په توپانزو سيمه کې شوې ده.
د کندهار د والي وياند صميم خپلواک پژواک خبري اژانس ته وويل، د ارغستان ولسوالۍ په توپانزو سيمه کې پر دوو ملکي وګړو هغه مهال د ماين چاودنه وشوه چې پر موټرسايکل روان وو.
هغه زياته کړه، په دې پېښه کې دواړه وګړي ځاى پر ځاى وژل شوي دي.
دى وايي، ماين د وسله والو مخالفينو له خوا تازه ځاى پر ځاى شوى و.
د يوه بل خبر له مخې، د سپين بولدک ولسوالۍ په شنه نري سيمه کې بيا د پوليسو پر رينجر موټر چاودنه شوې، چې د خپلواک په خبره، دوه پوليس په کې ټپيان شوي دي.
خو يوه سرچينه بيا په دې پېښه کې د ٤ پوليسو د ټپي کېدو خبره کوي.
په کندهار کې په دې وروستيو کې د سړک غاړې د ماين چاودنو پېښې ډېرې شوې دي.
وسله والو په دې اړه څه نه دي ويلي.
وړمه ورځ د ميوند ولسوالۍ په بند تېمور سيمه کې هم پر يوه موټر سايکل د ماين چاودنه شوې وه چې په کې پلار، زوى او لور درې واړه وژل شوي وو.
login or register a new account.
