کابل (پژواک، ٢٣ غويى ٩٦): وسله والو کسانو د پاکستان د بلوچستان ايالت اړوند په نوي جوړېدونکي سوداګريز بندر ګوادر ښار کې لس کاريګر وژلي دي.
پاکستاني رسنيو د بلوچستان ايالت د ځايي چارواکو په حواله د غويي په ٢٣مه خبر ورکړى چې دا پېښه نن له غرمې مخکې رامنځته شوې ده.
د بشير بنګلزي په نوم يوه ځايي دولتي چارواکي ويلي چې دا پېښه د ګوادر په پشکان او ګنت سيمو کې رامنځته شوې ده.
د بلوچستان ايالت د کورنيو چارو وزير سرفراز بګټي ويلي چې وژل شوي کاريګر د سند ايالت د نو شهرو فيروز سيمې اوسېدونکي وو.
سرچينې زياته کړې چې دغه کاريګر په سيمه کې د يوه سړک جوړولو په کار بوخت وو چې نامعلومو وسله والو پرې ډزې کړې د ي.
ګوادر بندر د چين په مرسته جوړېږي او له دغه ځاى څخه تر چينه پورې يوه لويه سوداګريزه لاره او دهلېز هم جوړېږي.
د يادونې ده، پرون هم په بلوچستان ايالت کې د پاکستان د مشرانو جرګې د مرستيال عبدالغفور حيدري پر موټريز کاروان چاودنه شوې وه چې له امله يې ٢٦ کسان ووژل شول او لسګونه نور ټپيان وو.
login or register a new account.
