د منګلو او مقبلو قومونو ترمنځ د ځمکې د ملکيت پر سره شخړه هواره شوه

خوست ښار (پژواک،۲سلواغه۹۶): په خوست کې د منګلو او مقبلو دوو قومونو ترمنځ د ځمکې او غره د ملکيت پرسر راپورته شوې وسله واله شخړه د يوې غونډې په ترڅ کې هواره شوه.

د منګلو او مقبلو قومونو ترمنځ دغه شخړه د لسګونو کلونو راهيسې د بازي په نوم د يوه غره او د سينځيلۍ په نوم د ځمکې د ملکيت پرسر روانه وه، چې دواړو لوريو ته په کې د سر او مال زيانونه هم اوښتي دي.

ياده شوې شخړه د هغه ۸۳ کسيز پلاوي په مټ هواره شوه، چې د ولسمشر په حکم د سوېل ختيځو ولايتونو د قومونو ترمنځ د شخړو او لانجو د بنسټيز حل په موخه جوړ شوی، چې غړي يې هم د همدې ولايتونو يو شمېر ديني عالمان او قومي مشران دي.

د خوست والي حکم خان حبيبي په همدې تړاو جوړې شوې غونډې ته وويل، د هغې پرېکړې له مخې چې ياد شوي پلاوي کړې، منګل او مقبل قومونه به خپلې مورچلې ړنګوي او درنې وسلې به دولت ته سپاري.

نوموړي وويل، د شوې پرېکړې له مخې به دواړه قومونه په خپلو سيمو کې شکمنو کسانو ته د تګ راتګ اجازه نه ورکوي او دواړه به د تېر په څېر له يو بل سره د ورورۍ ژوند پيلوي.

والي حبيبي زياته کړه، پرېکړه وروستۍ ده او که هر چا له دې وروسته له شوې پرېکړې سرغړونه وکړه، امنيتي ارګانونو ته امر شوی  چې پر وړاندې يې جدي اقدامات وکړي.

هغه زياته کړه: ((زه نن په سراحت سره د دواړو قومونو مشرانو ته وايم، که چېرې مو دا پرېکړه ونه منله، نو امنيتي ارګانونو ته مې دا سپارښتنه ده، جدي اقدامات وکړي او زه نه پرېږدم چې يو د نظام دننه يو بل په ټوپک وګواښي او دا بغاوت دی.))

له دې وړاندې هم څو ځله د منګلو او مقبلو قومونو ترمنځ د راپورته شوې شخړې په هکله پرېکړې شوې، خو عملي شوې نه دي، خو دا ځل د خوست والي ډاډ ورکوي چې دا پرېکړه به نه ماتيږي او هغوی به يې تطبيقوي.