د کاپیسا په تګاب کې د هوايي برید له امله څلور طالبان او دوه ملکي وګړي وژل شوي

محمودراقي (پژواک، ٦ زمرى ٩٧): د کاپيسا په تګاب ولسوالۍ کې د عملياتو پر مهال څلور وسله وال او دوه ملکي وګړي وژل شوي دي.

د تګاب ولسوالۍ امنيه قوماندان محمد نعيم ساپي د زمري په ٦مه پژواک خبري اژانس ته وويل چې هوايي ځواکونو تېره شپه د وسله والو مخالفينو د يوه قوماندان پر کور چې غونډه په کې روانه وه، بريد وکړ.

هغه زياته کړه چې له وسله والو سره په یاده غونډه کې دوه ملکي وګړي هم وو چې په دغه برید کې له څلورو وسله والو طالبانو سره یو ځای وژل شوي دي.

د نوموړي په وینا چې هوايي ځواکونه اوس وخت ناوخت په تګاب کې د وسله والو مخالفینو پر مهمو ځایونو بمبار کوي.

د سيمې يوه اوسېدونکي ایمل پژواک ته وويل چې په ياده پېښه کې وسله والو او ملکي وګړو دواړو ته مرګ ژوبله اوښتې ده.

د هغه د معلوماتو له مخې، وژل شوي کسان د خوست ولايت اوسېدونکي وو.

د طالبانو وياند ذبيح الله مجاهد بيا وايي چې د تګاب په هوايي بريد کې ملکي وګړو ته مرګ ژوبله اوښتې ده.

د يادونې ده، تېره اوونۍ په ياده ولسوالۍ کې د نښتو پر مهال ګڼ شمېر وسله والو مخالفينو ته مرګ ژوبله اوښتې وه.