دفاع وزارت: په تېرو ۲۴ ساعتونو کې ۷۲ وسله والو مخالفینو ته مرګ ژوبله اوښتې

کابل (پژواک، ۲۹ لړم ۹۷): د ملي دفاع وزارت وايي چې په تېرو ۲۴ ساعتونو کې یې په ځینو تعرضي او چاڼیزو عملیاتو کې چې د هېواد په بېلابېلو سیمو کې یې ترسره کړي، ۳۸ وسله وال مخالفین وژل شوي او ۳۴ نور ټپیان شوي دي.

د افغانستان د ملي دفاع وزارت له خوا د لړم په ۲۹مه پژواک خبري اژانس ته په یوه رالېږل شوې خبرپاڼه کې راغلي چې په تېرو ۲۴ ساعتونو کې یې ۱۱  ګډ تعرضي او چاڼیز عملیات، ۹۸ ځانګړي کومانډویي دندې او ۶ هوایي بریدونه د وسله والو مخالفینو د له منځه وړو په موخه د هېواد په بېلابېلو سیمو کې ترسره کړي دي.

خبرپاڼه کاږي، د امنیتي ځواکونو د یادو عملیاتو په پایله کې چې د افغانستان  هوایي ځواکونو ملاتړ هم ورسره و، ۳۸ وسله وال مخالفین وژل شوي او ۳۴ نور ټپیان شوي دي.

د سرچینې په خبره چې دغه عملیات په ننګرهار، لغمان، لوګر، پکتیا، پکتیکا، غزني، کندهار، فراه، تخار،  بلخ  او هلمند ولایتونو کې ترسره شوي دي.

د ملي دفاع وزارت وايي چې ځواکونو یې په دغو عملیاتو کې له وسله والو مخالفینو وسلې، وسایط او تجهیزات هم ترلاسه کړي دي.

د یادونې ده، په دې وروستیو کې د هېواد په یو شمېر سیمو کې نا امنۍ مخ پر ډېرېدو دي چې له امله یې خلک له ستونزو سره مخ دي.