حکومتي سرچينه: طالبانو سره د سولې مذاکراتي ټيم په غړو کې بدلون راځي

کابل (پژواک ٥ کب ٩٧): يوه باوري حکومتي سرچينه وايي چې له طالبانو سره د سولې مذاکراتي ټيم په غړو کې بدلون راځي.

د روان کال د ليندۍ مياشتې په لومړيو کې ولسمشر غني اعلان وکړ چې د ولسمشرۍ د دفتر د رئيس سلام رحيمي په مشرۍ يې له طالبانو سره د مذکراتو لپاره ١٢ کسيزه ډله جوړه کړې ده. دغه راز يو بل مشورتي بورډ يې هم جوړ کړى چې يادې ډلې ته به سلا مشورې ورکوي.

تر دې وروسته، ولسمشر د ليندۍ په شلمه نېټه د فرمان له مخې، د سولې پروسې د عالي مشورتي بورډ او د سولې خبرو اترو د ټيم غړي وټاکل شول. په فرمان کې راغلي و چې د سولې بهیر د عالي مشورتي بورډ او د دولت د خبرو اترو ټیم، د تلپاتې سولې د ټینګښت لپاره د ملي هوکړې رامنځته کېدو په هدف له جهادي، سیاسي او ټولنیزو مشرانو او د ټولنې له بېلابېلو اقشارو سره له مشورو او بحثونو وروسته جوړ شوى دى.

يوه اونۍ وړاندې (د سلواغې ٢٩مه) د ولسمشر وياند هارون چخانسوري وويل چې د ولسمشر محمد اشرف غني او د افغانستان د سولې په چارو کې د امريکا استازي زلمي خليلزاد ترمنځ ناسته کې پر يوه نوي ميکانيزم چې د سولې بهير به مخ ته وړي، هوکړه وشوه.

خو نن (يکشنبه د کب ٥مه) يوې باوري حکومتي سرچينې، پژواک خبري اژانس ته وويل چې ولسمشر محمد اشرف غني له سياسي ګوندونو سره د مذاکراتي ټيم په اړه خبرې پيل کړې دي.

ده زياته کړه، ولسمشر له دوى سره د مذاکراتي ټيم د غړو او ميکانيزم په اړه مشورې کوي چې د دې اونۍ په پاى کې به د مذاکرې د نوي ټيم د غړو او د مذاکرې د ټيم پر جوړښت توافق وشي. ولسمشر غني تېره شپه د مخکيني ولسمشر حامد کرزي سره کتلي او د مشورو لړۍ پيل شوې ده.

د هغه په وينا، حکومت په پام کې لري چې په دې نوي مذاکراتي ټيم او جوړښت کې د افغانستان هغه سياسيون چې د ١٩٩٢ کلونو په جګړو او سياست ښکېل وو او د ٢٠٠١ کال څخه وروسته د نوي نسل استازي، شامل کړي.

دى وايي: "د امکان په صورت کې که چېرته له طالبانو سره مستقيم مذاکرات پيلېږي، کېداى شي دا نوى جوړښت او غړي يې د مشورتي جرګې له جوړېدو مخکې اعلان شي او که تر هغه وخته اړتيا ونه ليدل شي، حکومت به د سولې د مذاکراتي ټيم د جوړښت ميکانيزم او د غړو په اړه يې د جرګې مشوره هم واخلي او وروسته تر هغه به په ډاګه شي."

سرچينه زياتوي، هغه مهال چې د مذاکراتي ټيم غړي اعلان شول، نو په هماغه وخت کې ويل شوي و چې د ټيم شمېر او د ټيم د غړو نومونه د ضرورت په وخت کې ښايي بدل شي، نو اوس د سياسيونو د غوښتنې او د اړتيا له مخې په دې ټيم کې بدلون راځي.

تمه ده چې د سولې په اړه مشورتي لويه جرګه د روانې کب مياشتې په وروستيو ورځو کې ترسره شي.

په دې وروستيو څو مياشتو کې د سولې په برخه کې د امريکا ځانګړي استازي زلمي خليلزاد په افغانستان کې د سولې د راوستو په موخه له طالبانو سره څو ځلي کتلي او ټاکل شوې چې سبا (دوشنبه) په قطر کې يو ځل بيا سره وګوري.