کابل (پژواک، ٣٠ غبرګولی ٩٨): د افغانستان برېښنا شرکت د برېښنا د غلو او هغو کسانو د عدلي تعقیب لپاره له لویې څارنوالۍ سره هوکړه لیک لاسلیک کړ چې د برېښنا زېربناوو ته زیان رسوي.
د برېښنا شرکت په هغې خبرپاڼه کې چې پژواک خبري اژانس هم ترلاسه کړی راغلي، دغه هوکړه لیک د لوی څارنوال مرستیال څارنپوه نور حبیب جلال او د افغانستان برېښنا شرکت عمومي اجرایوي رییس انجنیر امان الله غالب لاسلیک کړې ده.
د دغه هوکړه لیک له مخې، د «لویې څارنوالۍ او برېښنا شرکت» ګډه کمېټه د افغانستان په کچه د برېښنا د غلو او د برېښنا د ناسمې استفادې کوونکو د عدلي تعقیب لپاره جوړه شوې ده.
سرچینې زیاته کړې، دغه کمېټه دنده لري څو د هغو کسانو معلومات چې د برېښنا انرژي یې غلا کړې او یا یې د برېښنا سرچینو ته زیان رسولی، د قانون په رڼا کې د عدلي او قضايي تعقیب لپاره لویې څارنوالی ته معرفي کړي.
سرچینه زیاتوي، لویه څارنوالي په جدي توګه قضیې څېړي او پایله یې د افغانستان له خلکو او برېښنا شرکت سره شریکوي.
دغه پرېکړه لیک د جزا کود د ۱۴، ۷۰۱ او ۷۱۰ موادو په اساس جوړ شوی دی.
login or register a new account.
