کابل (پژواک، ٢٦ چنګاښ ٩٨) : دامريکا سفارت له ولسمشريزو ټاکنو سره د ٢٩ ميليونه ډالرو مرستې د اعلان ترڅنګ له ټولو کانديدانو غوښتي چې قانون ته درناوى ولري او دولتي امکانات دې د کمپاين لپاره نه کاروي.
تر دې مخکې د افغانستان د ماليې وزارت د ټاکنو د خپلواک کمېسيون په غوښتنه د راتلونکو ولسمشريزو ټاکنو لپاره بوديجه اعلان کړې ده.
په کابل کې د امريکا سفير جانباس وايي چې دوى د افغان حکومت له خوا د ټاکنو د بوديجې پر اعلان خوښ شوي دي.
هغه په يوه ويډيويي پيغام کې چې دامريکا سفارت له خوا خپور شوى ويلي، د افغان حکومت له اعلان وروسته امريکا هم د ټاکنيزو کارونو لپاره د ٢٩ ميليونه ډالرو مرستې اعلان کوي.
ده زياته کړې، ددې ترڅنګ د ټاکنو د داخلي څارونکو مالي تمويل هم ورکوي، څو خلک د دې ټاکنو پر پروسې او پايلو باور ولري.
د امريکا سفير وايي، که څه هم د بوديجې اعلان مهم قدم دى، خو ددې ترڅنګ تر ټاکنو وړاندې بايد يو شمېر نور اقدامات هم ترسره شي.
جان باس زياته کړې، د ټاکنيزو کمېسيونونو ترڅنګ اړونده وزارتونه هم بايد جدي اقدامات وکړي، څو ولسمشريزې ټاکنې په خپل اعلان شوې نېټې ترسره شي.
ټاکل شوې ده چې د ولسمشرۍ ټاکنې د روان لمريز کال د تلې په مياشت کې ترسره شي.
هغه وايي : (( ټاکنيز کمېسيونونه بايد نور اضافي مامورين پر دندو وګوماري او روزنه ورکړي، د رايه ورکوونکو لېستونه چاپ او خپاره شي، د بايومټرک ماشينونو د اخيستلو پروسه ژر تر ژره بشپړه شي.))
د امريکا سفير ويلي، پر وخت د ټاکنو ترسره کولو لپاره د يادو کارونو بشپړول اړين دي.
جان باس زياته کړې : (( لکه د نورو افغانانو موږ هم قوي هيله لرو چې د ولسمشرۍ ټاکنو ټول کانديدان قانون ته درناوى ولري او دولتي چارواکي د يو کانديد په ملاتړ له دولتي امکاناتو کارولو څخه ډډه وکړي.))
د هغه په وينا، ټول کانديدان چې اوس دولتي دندې لري يا نه، له دولتي امکاناتو څخه په هر ډول چې وي، له استفادې ډډه وکړي، ځکه چې دا د ټولو افغانانو او امريکا هيله ده.
login or register a new account.
