کابل (پژواک، ١٢ زمرى ٩٨) : د افغانستان د مشرانو جرګې د رييس فضل هادي مسلميار په مشرۍ يو لوړ پوړى پلاوى په رسمي سفر ايران ته روان شوى دى.
د مشرانو جرګې له خوا د زمري په ١٢مه، پژواک خبري اژانس ته په يوه رالېږل شوې خبرپاڼه کې راغلي، پلاوى به په دې سفر کې د ايران ولسمشر ډاکټر حسن روحاني، ددې هېواد د مذهبي مشر آيت الله علي خامنه اي، د ايران د اسلامي شورا د مجلس له رييس علي لاريجاني، د سترې محکمې د قاضي القضات او بهرنيو چارو د وزير په ګډون ددې هېواد له يوشمېر نورو لوړپوړو دولتي چارواکو سره وګوري.
په خبرپاڼه کې راغلي، په دې ليدنو کې به د پارلماني اړیکو د پیاوړتیا، د افغانستان د سولې په پروسه کې د ګاونډیو هېوادونو د رول، د دواړو هېوادونو ترمنځ د سوداګرۍ پر ډېرېدو او پانګونې، د افغان کډوالو پر ستونزو، د اسلامي هېوادونو ترمنځ د اړیکو پر غښتلتيا، د سيمې او نړۍ پر وروستيو بدلونونو او يو شمېر نورو مهمو موضوعاتو په اړه ملاقاتونه او بحثونه ولري.
login or register a new account.
