په هرات کې ۱۴ ملکي وګړي او ولسي پاڅون کوونکي وژل شوي

هرات ښار (پژواک، ٦ وږی ٩٨): د هرات حکومتي چارواکي وايي چې په دغه ولایت کې ۱۴ ملکي وګړي او ولسي پاڅون کوونکي وژل شوي دي.

د هرات د پولیسو ویاند عبدالاحد ولي زاده نن پژواک خبري اژانس ته وویل، تېره شپه ۱۲ بجې د کشک رباط ولسوالۍ په چهاردره سیمه کې د وسله والو طالبانو او ولسي پاڅون کوونکو ترمنځ نښته شوې ده.

د ولي زاده په خبره، په دې نښته کې ۱۴ ملکي وګړي او ولسي پاڅون کوونکي وژل شوي دي.

هغه زیاته کړه، سیمې ته د مرستندوی سرتېرو له لېږلو وروسته طالبان تښتېدلي دي.

ولي زاده وویل، په یاده نښته کې یو شمېر ملکي وګړي او ولسي پاڅون کوونکي ټپیان شوي هم دي.

د هرات د پولیسو د ویاند په خبره، تر اوسه معلومه نه ده چې په وژل شوو کې څو ملکي او څو نظامي کسان شامل دي.

په ورته وخت کې د هرات امبولانس مسوول ډاکتر ابراهیم محمدي وویل، په دې پېښه کې نهه کسان ټپیان دي چې شپږ یې د هرات امبولانس په وسیله د دغه ولایت ولایتي روغتون ته انتقال شوي دي.

هغه زیاته کړه، له دې پېښې ۱۴ جسدونه د رباط سنګي ولسوالۍ روغتیايي کلینیک ته لېږدول شوي دي.

بلخوا طالبانو هم یاده پېښه تایید کړې ده.

د طالبانو ویاند قاري یوسف احمدي وايي چې تېره شپه طالبانو د هرات د رباط سنګي ولسوالۍ په وکیل احمد کلي کې د ولسي پاڅون کوونکو پر امنیتي پوستو برید کړی دی.

هغه ادعا کړې چې د دوی کسانو په دې پېښه کې ۱۱ ولسي پاڅون کوونکي وژلي او درې نور یې ټپیان کړي دي.