د پکتيکا د مټاخان ولسوالۍ د سيمه ييزو پوليسو قوماندان ووژل شو

ښرنه (پژواک، ٢ تله ٩٨) : په پکتيکا ولايت کې د نښتو او هوايي بريدونو له امله د سيمه ييزو پوليسو يو قوماندان او ١٦ وسله وال طالبان وژل شوي دي.

د پکتيکا ولايت امنيه قوماندان سمونوال ايمل نيازي د تلې په ٢مه، پژواک خبري اژانس ته وويل چې تېره شپه وسله والو طالبانو د مټاخان ولسوالۍ د کرمو پر پوسته ډله ييز بريد کړى و.

هغه زياته کړه، دغه بريد د امنيتي ځواکونو له لوري په شا وتمبول شو او وروسته هوايي بريد هم ترسره شوچې په پايله کې يې ۱۶ وسله وال طالبان وژل شوي او ۳ نور ټپيان شوي دي.

نيازى وايي، په دې جګړه کې د مټاخان ولسوالۍ دسيمه ييزو پوليسو قوماندان هاشم هم وژل شوی او د هغه يو ساتونکی ټپي دی.
د مټاخان ولسوالۍ يوه اوسېدونکي سيد نور هم پژواک ته وويل چې د دې ولسوالۍ د سيمه ييزو پوليسو قوماندان تېره شپه له وسله والو طالبانو سره په نښته کې وژل شوی دی.

د هغه په وينا، د پنځو وسله وال جسدونه يې هم ليدلي دي.

وسله والو والو طالبانو تر اوسه په دې اړه څه نه دي ويلي.