دزابل جګړه کې ۱۲ طالبانو او پولیسو ته مرګ ژوبله اوښتې

کلات (پژواک، ۲۷ وری ۹۹) : د زابل ولایت د ارغنداب ولسوالۍ په جګړه کې ۱۲ تنو وسله والو طالبانو او پولیسو ته مرګ ژوبله اوښتې ده.

په زابل کې د ملي اردو د لوا رییس ارکان  ډګروال احمد جان احمدي د وري په ۲۷مه، پژواک اژانس ته وویل چې تیره شپه  وسله والو طالبانو د یوه نفوذي پولیس په مرسته د ارغنداب ولسوالۍ پر مقام برید کړی و.

هغه زیاته کړه، چې په دې برید کې یو پولیس ووژل شو او څلور نورژوبل شوي دي.

د ډګروال احمدي په وینا، ددولتي ځواکونو په ځوابي برید کې پنځه وسله وال طالبان ووژل شول او دوه نور یې ټپیان شوی دي.

وسله والو طالبانو تر اوسه په دې اړه څه نه دي ویلي.