هرات (پژواک، ۱۲ سلواغه ۱۴۰۴): د ریاستالوزراء اقتصادي مرستیال ملا عبدالغني برادر اخند د ترکمنستان د لومړي وزیر د مرستیال او د بهرنیو چارو د وزیر رشید مردوف په مشرۍ له راغلي پلاوي سره د لیدنې په موخه هرات ته تللی دی.
د هرات د والي ویاند محمدیوسف سعیدي پژواک ته وویل چې دا لیدنه د افغانستان او ترکمنستان ترمنځ د اقتصادي، سوداګریزو او ترانزیټي همکاریو د پیاوړتیا لپاره ترسره کېږي.
هغه زیاته کړې، په دې غونډه کې به د ټاپي د ګاز نللیکې غځولو پروژې د پرمختګ، د تورغونډۍ بندر د ظرفیت لوړېدو، د ترانزیټي اسانتیاوو پراختیا او دوهاړخیزو اړیکو پیاوړتیا په اړه خبرې او ارزونې وشي.
مفتی سعیدي همدارنګه وویل چې په دې لیدنه کې به د ګډو اقتصادي پروژو پلې کېدو چارو د چټکتیا، د سیمهییزو تعاملاتو ډېرېدو، د سوداګرۍ د پراختیا او د هېواد په لوېدیځ کې د کارموندنې په اړه هم بحث وشي.
