کرنې وزارت خلکو ته په څو مواردو کې نږدې ۶۵۰ میلیونه افغانۍ پور ورکوي

کابل(پژواک،  ۲۸ غبرګولى ۹۹): د کرنې وزارت وايي چې اړوند کمېټې یې د ۶۳۲.۶ ميليونه افغانیو د پور ورکړه تایید کړې او دا اندازه پیسې به په څو مواردو کې خلکو ته ورکړل شي.

له ياد وزارته د غبرګولي په ۲۸مه پژواک خبري اژانس ته په رالېږل شوې خبرپاڼه کې راغلي چې نن د دغه وزارت د کرنيزو پورونو د تاييد کمېټې د يوې غونډې په ترڅ کې د ۶۳۴.۶ ميليونه افغانۍ کرنيز پورونه تاييد کړل.

سرچینه زیاتوي، کرنيز پورونه په درېیو مواردو کې تاييد شوي چې لومړى به يې د مالي موسسې له خوا هر کال د پنځو کلنو لپاره د هېواد په اتو ولايتونو کې څه باندې زر بزګرانو ته ورکول کېږي، دويم مورد د فابريکو د جوړښت لپاره او درېیم يې د غنمو پېرلو لپاره ځانګړى شوى.

په خبرپاڼه کې راغلي، د کرنې د پراختیا صندوق چې د دغو پورونو ورکوونکى دى، وايي: "په دې سختو شرایطو کې یې بزګران نه دي هېر کړي او دې ته ژمن دی چې د دوی د اړتیا وړ پورونه پر خپل وخت د هغوی په واک کې ورکړي."

خبرپاڼه زياتوي، د کرنې د پراختیا صندوق یو غیر دولتي بانکي بنسټ دی چې د ياد وزارت تر چتر لاندې کار کوي او دغه صندوق د افغانستان د کرنې د ودې او ښه کولو په موخه د مالي پور ورکولو له لارې بزګرانو او سوداګرو ته پورونه ورکوي.

سرچينې زياته کړې، یاد صندوق  تر دې دمه ۱۱.۲ میلیارده افغانۍ پور تاييد کړی او دغه راز کرنیزو سوداګرو، د مالدارۍ ټولنو، د غواګانو د ساتنې، کبانو روزنې او چرګانو روزنې فارمونو، د وچو او تازه مېوو صادروونکو او پروسس کوونکو، د اوړو د تولید فابریکو، د کرنیزو توکو د تولید شرکتونو، مغازو او د کیمیاوي سرو واردوونکو او د کرنې برخې پر سوداګرو ۸.۶ میلیارده افغانۍ وېشلې دي.

همداراز له دغو خدمتونو په ۳۲ ولایتونو کې ۵۲زره او ۷۷۲ بزګران په مستقیم ډول برخمن شوي دي.