جلال اباد (پژواک، ١٥ لړم ٩٩): د ننګرهار ښاري محکمې د کورني او بهرني جرايمو پر وړاندې د مبارزې دېوان قضايي پلاوي د انسان تښتونې په قضيه کې دوه کسان د اعدام پر سزا محکوم کړل .
د ننګرهار ولايت مقام له خوا د لړم په ١٠مه په يوه خپره شوې خبرپاڼه کې راغلي چې دا قضايي علني محکمه پرون د ښاري محکمې د ريیس قضاوتمند محمد انعام فايق په مشرۍ جوړه شوې وه.
سرچينې زياته کړې چې د یادې محکمې پر مهال دوه تنه د انسان تښتوونې په قضیه کې د اعدام پر سزا محکوم شول. دغه راز په دې قضیه کې دوو نورو ته د لازمو دلایلو د نه شتون له امله برائت ورکړ شو.
سرچينې زياته کړې، د علني غونډې قضايي پلاوي تورنو او د قضيې زيانمنو له خبرو اورېدو وروسته د قضيې د ټولو طرفينو په شتون کې د رايو په يووالي سره دوه کسان د يوه کس د تښتونې په قضيه کې چې له تښتولو وروسته يې وژلى و، د جزا کوډ د ۵۰۸ مې او ۱۷۰مې مادو د ۱ فقرې پر بنسټ د اعدام پر سزا محکوم کړل. دغه راز دوه نور په همدې قضيه کې د لازمو د لايلو د نه شتون له امله د جزا کوډ ۵مې مادې پر بنسټ برائت شول.
په خبرپاڼه کې راغلي، همدارنګه پر اعدام محکوم شوي دوه کسان چې د تښتول شوي کس له کورنۍ يې پنځه سوه زره پاکستانۍ کلدارې اخیستې وې، د هغو پر بېرته ورکړه یې هم حکم وشو.
د علني غونډې قضايي پلاوي وويل، د تورنو پر وړاندې، شوې پرېکړه وروستۍ نه ده، کولای شي د استيناف غوښتنه وکړي .
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن