د کابل په ارغندۍ کې چاودنې شپږو امنیتي سرتېرو ته مرګ ژوبله اړولې ده

کابل ښار (پژواک، ٢٣ لړم ٩٩): د کابل په پغمان ولسوالۍ کې د چاودنې له امله دوه سرتېري وژل شوي او څلور نور ټپيان شوي دي.

د کورنيو چارو وزارت وياند طارق ارين د لړم په ٢٣مه پژواک خبري اژانس ته وويل چې نن سهار د پغمان ولسوالۍ په ارغندۍ سيمه کې چاودنه شوې ده.

هغه وايي چې په دې چاودنه کې دوه سرتېري وژل شوي او څلور نور ټپيان شوي دي.

دغه راز د کابل د امنيې قوماندانۍ وياند فردوس فرامرز هم دغه پېښه تاييدوي او وايي چې یاده چاودنه د پغمان ولسوالۍ د ارغندۍ په چوک کې رامنځته شوې ده.

خو بل لور ته په ټولنيزو رسنيو ځینو کسانو ليکلي چې د پغمان ولسوالۍ په ارغندۍ سيمه کې د ملي اردو پر کنډک موټربم بريد شوى دى.

د يادونې ده، په دې وروستيو کې د هېواد په بېلابيلو سيمو کې د موټربم بريدونو کچه لوړه شوې ده.