ترينکوټ (پژواک، ١٧ ليندۍ ٩٩): د اروزګان په دهراوود ولسوالۍ کې د امنیتي ځواکونو او طالبانو ترمنځ نښته کې یو واکیسناتور هم د ولسوالۍ په روغتون کې وژل شوى دى.
د اروزګان د عامې روغتیا ریاست د واکسین برخې مسوول سیف الدین پژواک ته وويل چې سات محمد نن سهار په روغتون کې پر ډزو وژل شوی دى.
سیف الدین وایي، تر اوسه معلومه نه ده چې د کومې ډلې له خوا په نښه شوی، خو په سیمه کې سخته جګړه روانه ده.
دى زياتوي: ((سات محمد کلونه د ولسوالۍ په روغتون کې واکسيناتور و، خو نن سهار په روغتون کې وژل شوى دى.))
د وژل شوي روغتیایي کارکوونکي د تره زوی اغاجان پژواک ته وویل، سات محمد نن سهار روغتون کې پر ډزو لګېدلی او مړ شوى دى.
هغه وایي، د نوموړي جسد اوس هم سیمه کې پروت دى او د جګړې له امله هغوی یې نه شي ترلاسه کولای.
درې ورځې مخکې امنیتي ځواکونو دهراوود ولسوالۍ له طالبانو بېرته ونيوله چې د بیاځلي نیولو لپاره يې طالبانو یوځل بیا هڅې پيل کړې دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن