کابل (پژواک، ۲۸ لیندۍ ۹۹) : د پاکستان لومړي وزیرعمران خان ملا برادر شره په لیدنه کې په افغانستان کې د تاوتریخوالي پر زیاتوالي انديښنه وښوده او پر ټولو خواوو یې غږ وکړ چې تاوتریخوالی کم کړي څو اوربند ته لاره هواره شي.
په اسلام اباد کې د پاکستان لومړي وزیر له دفتر څخه د لیندۍ په ۲۸مه، په یوه خپره شوې خبرپاڼه کې راغلي چې د ملا برادر په مشرۍ د طالبانو پلاوي نن تر غرمې وروسته لومړي وزیر عمران خان سره ولیدل.
سرچینې زیاته کړې چې دواړو لوریو د افغان سولې پروسې پر وروستیو پرمختګونو او راتلونکو پړاوونو خبرې وکړې.
د پاکستان لومړي وزیر عمران خان په دې لیدنه کې ویلي چې د افغانستان شخړه نظامي حل لاره نه لري او بین الافغاني مذاکرات ددې شخړې هواري لپاره تاریخي فرصت رامنځته کړی دی.
نوموړي هیله څرګنده کړې چې افغان لوري به د بین الافغاني مذاکراتو پر مهال ترلاسه شوي نور مثبت اقدامات وکړي.
د پاکستان لومړي وزیر ویلي چې هیواد یې په افغانستان کې د یوه پراخ بنسټه جامع سیاسي هواري ملاتړ کوي .
عمران خان په افغانستان کې د تاوتریخوالي پر زیاتوالي انديښنه وښوده او پر ټولو خواوو یې غږ وکړ چې تاوتریخوالی کم کړي څو اوربند ته لاره هواره شي.
په خبرپاڼه کې راغلي چې اسلام اباد ته د طالبانو دسیاسي دفتر د پلاوي سفر په افغان سوله کې د پاکستان د هڅو او همکاریو یوه برخه ده.
د طالبانو دقطر دفتر ویاند ډاکټر محمد نعیم وایي چې په دې لیدنه کې په پاکستان کې د افغان کډوالو پر ستونزو، د مسافرو پر تګ راتګ او تجارتي مسایلو خبرې وشوې.
هغه په ټویټر کې لیکلي چې دغه راز په دې لیدنه کې د افغانستان پر وروستیو حالاتو هم خبرې وشوې.
د یادونې وړ ده چې دطالبانو نهه کسیز پلاوی له تیرو دریو ورځو راهیسې په اسلام اباد کې دي، پرون یې د بهرنیو چارو وزیر شاه محمود قریشي سره هم لیدلي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن