کابل (پژواک، ٧ مرغومى ٩٩): د ملي روغې جوړې عالي شورا وايي چې د سولې خبرو دويم پړاو به د ٢٠٢١ميلادي کال د جنورۍ په ٥مه په دوحه کې پيل شي.
د يادې شورا وياند فريدون خوځون د مرغومي په ٧مه پژواک اژانس ته وويل چې د ملي روغې جوړې شورا پرېکړه کړې چې د سولې خبرو دويم پړاو خبرې په دوحه کې پيل شي.
د ده په وينا چې دوى په دې برخه کې د قطر هېواد له کوربه توبه مننه کوي.
د نوموړي په خبره، يو زيات شمېر هېوادونو د دغو خبرو کوربه توب لپاره وړانديزونه کړي وو، خو د کرونا وبا د دويمې څپې خپرېدو له امله هغوى له دغه کاره تېر شول او په قطر کې يې د دويم پړاوو خبرو د پيل ملاتړ کړى دى.
په قطر کې يوه باوري سرچينې هم پژواک ته وويل چې د سولې خبرو دويم پړاو خبرې به په ټاکل شوې نېټه په دوحه کې پيل شي.
يادې سرچينې چې نه يې غوښتل راپور کې یې نوم خپور شي، د مرغومي په ٧مه پژواک ته وويل چې دغه خبرې به پر ټاکلي وخت د دويم ځل لپاره په دوحه کې د حکومت او طالبانو مرکچي پلاوو ترمنځ پيل شي.
سرچينې زياته کړه چې له دې مخکې داسې فکر کېده چې د يادو خبرو دويم پړاو په جرمني، ناروې او يا کوم بل لېوال هېواد کې پيل شي، خو د کرونا د دويمې څپې پيل له امله يادو هېوادونو لېوالتيا نه ده ښودلې، نو اوس ټاکل شوې چې د دغو خبرو دویم پړاو هم په دوحه کې پيل شي.
دغه راز ولسمشر غني او د ملي روغې جوړې عالي شورا مشر ډاکتر عبدالله عبدالله هم نن په ارګ کې سره کتلي او د سولې خبرو پرمختګونو او چمتووالي په اړه يې سره بحثونه کړي دي.
تېره ورځ د ځینو مطرحو سياستوالو په شتون کې د ملي روغې جوړې عالي شورا دويمه ناسته ترسره شوه چې بې له ځنډه د دويم پړاو خبرو غوښتنه هم په کې وشوه.
د يادونې ده، څه موده مخکې د دولت او طالبانو مرکچي پلاوو په قطر کې د درېیو اوونيو رخصتۍ پرېکړه وکړه چې نږدې دوه اوونۍ رخصتي يې پوره شوې او يوه اوونۍ وروسته به بېرته د دويم پړاوو خبرو په موخه دوحې ته سفر وکړي.
په قطر کې د وږي په ٢٢مه د دولت او طالبانو ترمنځ د سولې مخامخ خبرې د نړيوالو په حضور کې پيل شوې وې، چې د دغو خبرو پر مهال طرزالعمل نهايي او په اجنډا تازه بحثونه پيل شوي و چې دواړه لوري رخصت اعلان کړ.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن