ملي امنیت او لویې څارنوالۍ په عامې روغتیا وزارت کې څلور کسان د فساد په تور نیولي

کابل (پژواک ۸ مرغومی ۹۹) : ملي امنیت له لویې څارنوالۍ سره په ګډه د عامې روغتيا وزير د ورور په ګډون څلور تنه په دغه وزارت کې د بډو اخيستو په تور نيولي دي.

پژواک ته یوې باورې سرچینې د مرغومي په اتمه وویل چې دا څلور تنه نن ماښام شپږ نیمې بجې د عامې روغتیا له وزارت څخه بيول شوي او اوس د کابل امنیه قوماندانۍ په نظارت خانه کې تر پلټنو لاندې دي.

سرچینې زیاته کړه دغه کسانو د وزارت له ولایتي رئیسانو څخه د رشوت غوښتنه کوله چې د ملي امنیت او لوی څارنوالۍ لخوا نیول شوي دي.

سرچینه وایې په یادو کسانو کې د عامې روغتیا د وزیر ورور احمد شکران عثماني چې وزارت کې کومه رسمي دنده نه لري، د تره زوی کاوه سرمست زاده، د خاله زوی حامد حمیدي فرامز او د وزارت ارشد مشاور فریدون سلطاني شامل دي.

بل لورته د عامې روغتیا وزارت یوې بلې سرچېنې پژواک ته وویل چې د فریدون سلطاني د رشوت غوښتنې غږونه لویې څارنوالۍ ته په لاس ورغلي و او د هماغه پر بنسټ دوی دغه کسان نیولي دي .

د لویې څارنوالي ویاند جمشید رسولي هم پژواک ته تایید کړه چې یاده موضوع حقیقت لري او په دې اړه به نور جزئيات سبا ته له رسنیو سره شریک کړاى شي.

Views: 61