کابل (پژواک، ٨ سلواغه ٩٩) : د ناټو سرمنشي جينز سټولټنبرګ د امريکا له نوي ولسمشر جو بايډن سره د افغانستان په اړه او له نړيوالو ترهګرو سره د مقابلې په تړاو خبرې کړې دي.
د بلجيم په پلازمېنه بروکسل کې د ناټو سازمان له مرکزي دفتر څخه پژواک اژانس ته په يوه رااستول شوې خبرپاڼه کې راغلي چې سرمنشي جينزسټولټنبرګ د امريکا له نوي ولسمشر جو بايډن سره ټيلېفوني خبرې کړې دي.
سرچينې زياته کړې چې په دې اړيکه کې سرمنشي دامريکا نوي ولسمشر ته د هغه د لوړې مراسمو په ترسره کېدو مبارکي ورکړه او ويې ويل چې د ده د واکمنۍ په دوره کې به د ناټو او امريکا د اړيکو يو نوى پړاو پيل شي.
په خبرپاڼه کې راغلي، دواړو مشرانو ناټو سازمان ته د راپېښېدونکو ننګونو، له نړيوالې ترهګرۍ سره د مبارزې، د افغانستان او عراق په اړه هم خبرې شوې دي.
سرچينې ويلي چې دوى د کرونا پر ضد مبارزې او د اقليم د بدلون په اړه هم خبرې کړې دي.
د يادونې ده چې د امريکا د ولسمشر په توګه د بايډن تر ټاکل کېدو وروسته له ناټو سرمنشي سره د هغه دا لومړۍ اړيکه وه.
Views: 261
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن