کابل (پژواک، ١٧ سلواغه ٩٩) : د عامې روغتيا وزارت وايي چې چین له افغانستان سره د کرونا دوه سوه زره دوزه واکسین مرسته کوي.
د دغه وزارت له خوا په يوه خپره شوې خبرپاڼه کې راغلي چې د عامې روغتیا وزارت سرپرست وزیر ډاکټر وحید مجروح په کابل کې د چین له سفیر وانګ یو سره د ویډیو کنفرانس له لارې وکتل.
سرچينې زياته کړې، په دغې لیدنه کې د چین سفیر له افغانستان سره د کرونا دوه سوه زره دوزه واکسین مرستې خبر ورکړ چې په پام کې ده د واکسین دا کڅوړه به ژر تر ژره د افغانستان د عامې روغتیا وزارت ته ورکړل شي.
د عامې روغتیا سرپرست وزیر د دغه وزارت او د افغانستان د حکومت په استازیتوب د چین هېواد د دغې مرستې له امله مننه وکړه او د کرونا ویروس په بحران کې یې د چین هېواد مرستې وستایلې.
دغه راز ډاکټر مجروح په بېلابېلو برخو کې د روغتیايي کارکوونکو د ظرفیتونو لوړول، د لابراتوارونو پیاوړي کول او د جینوټایپنګ یوه جدي اړتیا وبلله او د چین له هېواد څخه یې وغوښتل چې په دغې برخه کې د افغانستان له روغتیا سکتور سره همکاري وکړي.
د چين سفير وانګ یو په افغانستان کې د همکاریو پر دوام ټینګار وکړ او د عامې روغتیا وزارت رهبرۍ د غوښتنو په پار یې د همکارۍ ژمنه وکړه.
د يادونې ده چې تر دې مخکې هندوستان هم له افغانستان سره د کرونا د ٥٠٠ زره دوزه واکسين مرستې اعلان کړى و.
Views: 45
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن