کابل (پژواک، ۶ غویی ۱۴۰۰): هغه خبر چې ژر به ۷۰۰۰ طالب بندیان خوشې او د طالب مشرانو نومونه به له تور نوملړه وایستل شي، ناسم دی او د «شېرمحمد عباس ستانکزي» په نوم له جوړ شوي جعلي ټویټر څخه خپور شوی دی.
ادعا: په نږدې راتلونکې کې به ۷۰۰۰ طالب بندیان خوشې او د طالب مشرانو نومونه به له تور نوملړه وایستل شي.
خامه پرس، خبريال وېبپاڼې، اريانا نيوز خصوصي تلوېزيون او ځينو نورو رسنيو نن خبر خپور کړی، وایي، د طالبانو د مرکچي پلاوي مرستیال شېرمحمد عباس ستانکزي تېره ورځ پر خپلې ټویټرپاڼې لیکلي چې ډېر ژر به د طالبانو ۷۰۰۰ نور بندیان خوشې او د طالبانو د مشرانو نومونه به د ملګرو ملتونو له تور نوملړه وايستل شي.
دا خبر په خواله رسنیو کې هم ډېر لاس په لاس شوی دی.
حقیقت موندنه:
د طالبانو وياند ذبيح الله مجاهد دغه خبرونه ناسم بولي،وایي:”د افغانستان اسلامي امارت د مذاکراټي ټيم مرستیال شېرمحمدعباس ستانکزی د ټويټرهېڅ اکاونټ نه لري.”
مجاهد، د عباس ستانکزي په نوم د جوړ شوي ټویټر انځور هم خپور کړی او وایي :”دغه اکونټ جعلي دی، اعتنا مه ورته کوئ.”
دا په داسې حال کې ده چې تېره شنبې (د غویي څلورمه) د افغانستان د ملي امنیت سلاکار حمدالله محب ويلي و، تر هغو چې د سولې تړون نه وي شوی، د افغانستان دولت د طالبانو نور زندانیان نه خوشې کوي؛ ځکه چې د ده په وینا، حکومت مخکې هم د طالبانو بندیان خوشې کړل، خو د سولې لپاره یې ګټه ونه کړه.
د افغانستان حکومت مخکې ۵۰۰۰ طالب بندیان او طالبانو زر تنه د دولت کسان له زندانونو خوشې کړل.
د ولسمشر لومړي مرستيال امرالله صالح هم مخکې ویلي و چې د پنځو زرو طالبانو خوشې کول د حکومت لویه تېروتنه وه او بیا به تکرار نه شي.
د دوحې تړون له مخې بايد د بين الافغاني خبرو تر پيل (تېر کال د وږي تر ۲۲مې) وروسته په درېیو میاشتو کې د طالبانو ټول بندیان خوشې شوي وای.
دغه راز په دغه تړون کې راغلي چې د بين الافغاني مذاکراتو له پيل سره به متحده ايالتونه د ملګرو ملتونو د امنيت شورا له نورو غړو او افغانستان سره په دې هدف دیپلوماټيکې هڅې پيل کړي چې د ۲۰۲۰ کال د مې تر ۲۹مې د بنديزونو له نوملړ څخه د طالبانو د غړو نومونه وايستل شي.
پايله: ځینو رسنیو د طالبانو د سیاسي دفتر مرستیال د ټویټري پوست پر بنسټ خبر ورکړی چې د طالبانو اووه زره نور بندیان خوشې کیږي او د طالب مشرانو نومونه له تور نوملړه ایستل کیږي، خو طالبان دغه ټویټري پاڼه جعلي بولي او وایي چې عباس ستانکزی تویټرپاڼه نه لري.
حکم: په نږدې راتلونکې کې د طالبانو د ۷۰۰۰ بندیانو د خوشې کېدو او له تور نوملړه د طالب مشرانو د نومونو ایستلو خبر ناسم دی.
Visits: 1542
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن