کابل (پژواک، ١١ غويى ١٤٠٠): طالبان هغه راپورونه ردوي چې ګواکې دوی په تېر یوه کال کې افغانستان کې د بهرنیو ځواکونو له پوځي اډو ساتنه کړې ده، خو حکومت وايي چې طالبان د واک ترلاسه کولو لپاره له هرې ممکنه لارې کار اخلي.
ادعا: طالبانو په افغانستان کې د بهرنیو ځواکونو له پوځي اډو ساتنه کړې
رویټرز خبري اژانس د درېیو لوېدیځو چارواکو په حواله پرون (د غويي ۱۰مه) راپور ورکړی چې وسله والو طالبانو د تېر څه باندې یوه کال په اوږدو کې په افغانستان کې د بهرنیو ځواکونو د پوځي اډو ساتنه کړې ده.
د یاد راپور له مخې، د وسله والو طالبانو له خوا په افغانستان کې د مېشتو بهرنیو ځواکونو د قرارګاوو امنیت نیونه له امریکا سره د دې ډلې د دوحې سولې تړون د یوې پټې ضمیمې پر اساس شوې ده.
خو د امریکا د بهرنیو چارو وزارت تر دې مهاله د دغې پټې ضمیمې موجودیت او په افغانستان کې د طالبانو له خوا د بهرنیو ځواکونو د قرارګاوو د امنیت نیونې په اړه غبرګون نه دی ښودلی.
د امریکا غږ پښتو وېبپاڼې او ویسا ورځپاڼې هم دغه خبر د یاد اژانس په حواله خپور کړی دی.
د امريکا غږ د راپور له مخې، دوو لوېدیځو چارواکو چې نه یې غوښتل نوم یې خپور شي، رویټرز ته ویلي چې وسله والو طالبانو امريکا ته په افغانستان کې د امریکايي ځواکونو پر مرکزونو د داعش په ګډون د نورو وسله والو ډلو د بریدونو مخنیوي وړاندیز کړی و چې د واشنګټن له خوا ومنل شو.
حقیقت موندنه:
په قطر کې د طالبانو د سیاسي دفتر ویاند محمد نعیم نن (شنبه) په خپلې ټويټرپاڼې کې یاد راپورونه رد کړل.
ده لیکلي: “کوم تبلیغات چې په ځینو رسنیو کې د اسلامي امارت د مجاهدینو له خوا د اشغالګرو د اډو د ساتنې په اړه ښکته پورته کېږي، بې اساسه تبلیغات دي، هېڅ حقیقت نه لري.”
د افغانستان ملي امنیت شورا سلاکار حمدالله محب بیا نن کابل کې خبري ناستې ته وویل چې حکومت د یادې مسئلې په اړه خبر نه و.
دی وايي: “په دې کې هېڅ شک نشته چې طالبان د واک ترلاسه کولو لپاره له هرې ممکنه وسیلې- چې باداران یې وايي- کار اخلي او هغوی ته هېڅ شی استثنا نه شي کېدای.”
دا په داسې حال کې ده چې د امریکا او وسله والو طالبانو ترمنځ د دوحې تړون له لاسلیک وروسته د امریکايي ځواکونو په وینا، تر دې مهاله په افغانستان کې د وسله والو طالبانو له خوا هېڅ امریکايي سرتېری نه دی وژل شوی.
پایله: ځینو رسنیو د رویټرز خبري اژانس په حواله راپورونه خپاره کړي چې طالبانو افغانستان کې د بهرنیو ځواکونو له پوځي اډو ساتنه کړې ده، خو طالبان دغه راپورونه “بې اساسه تبلیغات” بولي.
پرېکړه: هغه راپور چې طالبانو هېواد کې د بهرنیو ځواکونو له پوځي اډو ساتنه کړې، بې ثبوته ادعا ده
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن