کابل (پژواک، ۲۱ غبرګولی ۱۴۰۰) : په سعودي عربستان کې د افغانستان سفیر احمد جاوید مجددي وایي چې د مکې مکرمې د علماوو کنفرانس ډیرې ښې لاسته راوړنې درلودې او ددې کنفرانس د پریکړو د عملي کولو لپاره یو کمیسیون جوړ شوی دی.
د افغانستان او پاکستان ددیني عالمانو ګډ کنفرانس پرون د سعودي عربستان په کوربه توب او د سعودي د رابطه العالم الاسلامي لخوا د حرم شریف ترڅنګ په مکې ښار کې ترسره شو.
ددې کنفرانس په پای کې یوه ۱۵ ماده ییزه اعلامیه خبره شوې چې پکې د افغانستان له سولې پروسې ملاتړ ، د جګړو او وینې توییدنې مخالفت شوی دي.
په سعودي عربستان کې د افغانستان سفیر احمد جاوید مجددي د غبرګولي په ۲۱مه، پژواک خبري اژانس سره په یوه ځانګړې مرکه کې وویل، له نېکه مرغه دا کنفرانس ډیر بریالی و او ګډونوالو د افغانستان د سولې ملاتړ او د وینې توییدنې مخالفت وکړ.
هغه زیاته کړه : ” له دې کنفرانس څخه موخه داوه، چې چې د افغانستان او پاکستان دیني عالمان به یوه خوله د جګړې او د سولې ملاتړ وکړي او همدغسې وشول. ”
مجددي وایي چې سوله د افغانستان د خلکو او حکومت اصلي غوښتنه ده، او په دې برخه کې د پاکستان د علماوو ملاتړ اړین وو.
د افغانستان سفیر وایي، چې د پاکستان دیني عالمان اوسنۍ جګړه تحریم کړه او هر ډول تاوتریخوالی چې افغانانو ته او عام المنفعه ته زیان رسوي، مردود وګڼل .
د نوموړي به وینا، د کنفرانس ګډونوالو له افغان حکومت او طالبانو وغوښتل، چې د جګړو پر ځای د مذاکراتو میز ته وګرځي ، په سوله ییزه توګه خپلې شخړې هواري او یوې عادلانه سولې ته ځان ورسوي.
مجددي زیاته کړه، چې نن د حرمینو الشریفنو امام شیخ سدیس په افغانستان کې د سولې لپاره دعا وکړه، له سولې پروسې او د مکې د کنفرانس له پریکړو یې ملاتړ وکړ.
افغان سفیر وایي چې سعودي ته د افغانستان د حج د وزیر سفر ډیر بریالی و، د اسلامي کنفرانس له سرمنشي، د رابطه العالم اسلامي له مشر سره او نورو سره یې ولیدل چې ټولو د سولې لپاره دافغانستان له موقت څخه ملاتړ وکړ.
ده وویل چې د یاد کنفرانس پای کې د یوه کمیسیون جوړولو پریکړه وشوه، چې دوی به هر وخت ناستې کوي او د کنفرانس د اعلامیې او پریکړو د عملي کولو په اړه به سلا مشورې کوي.
د هغه په وینا، دا کمیسیون به په پاکستان کې د افغانستان خلاف د فتواګانو ورکولو او تاوتریخوالي ته د هوا ورکولو د هڅو مخنیوی هم کوی.
Visits: 1223
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن