د هرات- کابل یوه الوتنه کې د ترهګریز برید مخه نیول شوې ده

کابل (پژواک، ۱۱ چنګاښ ۱۴۰۰): د ملي امنیت عمومي ریاست وايي چې د هرات- کابل یوه الوتنه کې یې د ترهګریز برید مخنیوی کړی او د دې پېښې عامل یې نیول دی.

د ملي امنیت ریاست یوه خبرپاڼه کې چې نن خپره شوې، راغلي چې د دې ادارې منسوبینو د هرات- کابل یوه الوتنه کې ترهګریز برید شنډ کړ.

سرچینې زیاته کړې: ((سید ادریس د رجب علي زوی، یو ترهګر یې چې د هنرمند په جامه کې یې د لاسي بم RDX موادو لرونکی یو بم او کیمیاوي توکي په یوه رباب کې په ډېر ماهرانه ډول ځای پر ځای کړي وو او په دې لټه کې و څو دغه بم ته د پرواز پر مهال چاودنه ورکړي، پېژندلی او برید یې شنډ کړی دی.))

خبرپاڼه کې څرګنده شوې چې د خواجه عبدالله انصاري هوايي ډګر کې د سید ادریس وسایلو د تفتیش پر مهال د ملي امنیت او ملي پولیسو ځواکونو په چټکۍ عمل وکړ او مخکې له دې چې د نورو مسافرو په منځ کې وېره خپره شي د رباب په منځ کې ځای پر ځای شوي چاودېدونکي توکي کشف او شنډ کړل.

سرچینه وايي، که څه هم ترهګرې ډلې په پرله پسې ډول ملکي خلکو او ټولګټو تاسیساتو ته د زیان اړولو په هڅه کې دي، خو امنیتي او دفاعي ځواکونه په قاطعیت او وړتیا سره د دښمن شوم پلانونه شنډوي.

د ملي امنیت ریاست د یاد کس د نیولو او الوتنې د وخت په اړه چې ټاکل شوې وه کابل ته وشي، نور جزئیات نه دي وړاندې کړي.