په خوست کې د لومړي ځل لپاره د لبنياتو د توليد او پروسس فابریکه فعاله شوه

خوست ښار ( پژواک، ۱۲ چنګاښ ۱۴۰۰): په خوست ولايت کې د لومړي ځل لپاره د لبنياتو د توليد او پروسس يوې فابریکې په فعاليت پيل کړی چې د مسوولينو په وينا، د لبنياتو له پلوه يې تر يوه بريده د دغه ولايت د اوسېدونکو اړتيا پوره کړې ده.

د لبنياتو د توليد، پروسس او بسته بندۍ دغه فابریکه په دې وروستيو کې د يوتن خوستي پانګه وال له خوا جوړه شوې ده.

د حميدالله په نوم دغه خوستی پانګه وال وايي چې د لبنياتو د توليد، پروسس او بسته بندۍ په دې کارخانې باندې يې پنځه نيم ميليونه افغانۍ پانګونه کړې او راتلونکي کې پلان لري چې نوره پانګونه هم وکړي.

نوموړي پژواک ته وويل، دغه فابریکه په شپه او ورځ کې د پنځه ټنه لبنياتو د توليد، پروسس او بسته بندۍ ظرفيت لري، خو اړتيا ته په کتو د اوس لپاره يواځې يو ټن مستې له توليد، پروسس او بسته بندۍ وروسته بازار ته وړاندې کوي.

حميدالله وایي، چې د ښار او له نږې کليو هره ورځ شاوخوا شپږ سوه کيلوګرامه د غوا تازه شيدې را ټولوي او بيا يې په دې کارخانه کې پروسس کوي.

هغه زياته کړه: “د دغې کارخانې له جوړېدو مخکې خوست ته مستې له ايران څخه واردېدلې، اوس موږ د هغوی مارکېټ تر يوه حده پورې نيولی چې اوس له ايران څخه نه راځي او موږ خپلې مستې بازار ته ورکوو.”

نوموړی وایي ، دا مهال دوی د استوګنې په يوه کرايي کور کې فعاليت کوي او زياتوي که صنعتي پارک فعال شي، توليدات به يې نور هم زيات شي.

بل پلو د خوست د کرنې او مالدارۍ رياست د مالدارۍ او وترنرۍ امر روښان وايي، چې خوست کې هره ورځ له ۳۵ زرو نیولې تر ۴۰ زرو ليترو پورې د غوا شيدې توليديږي، چې له ډلې يې ډېر کم خلک بازار ته عرضه کوي او نورې بېرته په کورونو کې مصرفيږي.

ده پژواک ته وويل: ” اوس يو دوولس سنټرونه مو نوي جوړ کړي، هغه شيدې په تدريج سره راټوليږي او تقربياً روزانه پنځه سوه ليتره راټولیږي، هره ولسوالۍ کې يو سنټر دی هغه بيا مرکز ته راوړي او بيا خرڅيږي. اينده کې به دا دوام ولري او نور به هم زيات شي.”

بله خوا په خوست کې د کانونو او صنايعو خونې مسوولين بيا وايي چې دا مهال په دغه ولايت کې ۲۳۵ وړې او منځنۍ توليدي فابریکې په فعاليت بوختې دي.

د دغې خونې مرستيال سياف پژواک خبري اژانس ته وويل چې په دې کارخانو کې شاوخوا اووه زره کاريګر په کار بوخت دي، خو لويه ستونزه چې صنعتکاران ورسره مخ دي، د صنعتي پارک نه موجوديت دی.

هغه وايي: ” موږ په رهايشي کورونو کې فعاليت کوو، چې له ډېرو ستونزو سره مخ يو. که چېرته پارک صنعتي فعال شي؛ اوس موږ دا مهال ۷ زره کاريګر لرو، بيا به زيات خلک مصروف کړي او د وطن پر اقتصادي وده به زياته مثبته اغېزه وکړي.”

خو د خوست والي مهمند کټوازي بيا له پژواک اژانس سره خبرو کې ډاډ ورکړ چې په نږدې راتلونکي کې به په دغه ولايت کې د سموات په سيمه کې صنعتي پارک پرانيزي او هغه ستونزې يې چې په مخ کې دي، بې له کوم ځنډ څخه له منځه يوسي.

دی زياتوي: ” که هر څه مخالفت موجود وي، که هر څه مقاومت موجود وي، زه هغه افتتاح کوم او کار به پرې روان وي، په دې چې ځمکه پارک صنعتي ته تثبيت شوې ده د خوستوالو لپاره. تقريباً کم تر کمه به په صنعتي پارک کې تر پنځوس زره نفره خوستيان په کار باندې بوخت شي. نو هلته که يو کور دوه کوره په مخکې وي، هغه بايد موږ له منځه وباسو.”