د پروان سرخ پارسا ولسوالۍ بېرته دولتي ځواکونو نیولې ده

چاریکار (پژواک، ۲۷ چنګاښ ۱۴۰۰): د پروان ولایت سیمه ییزې او امنیتي سرچینې وايي چې امنیتي او دفاعي سرتېرو او بسیج شوو د دغه ولایت سرخ پارسا ولسوالۍ بېرته له طالبانو نیولې ده.

د کورنیو چارو وزارت هم په یوه خبرپاڼه کې ویلي چې امنیتي او دفاعي سرتېرو او د خلکو بسیج نن د پروان ولایت سرخ پارسا ولسوالۍ له طالبانو پاکه کړې ده.

په خبرپاڼه کې له جزئیاتو پرته راغلي چې په دغو عملیاتو کې طالبانو ته درنه مرګ ژوبله اوښتې او د سیمې د پاکولو عملیات دوام لري.

په پروان کې یوې سیمه ییزې سرچینې د نوم نه خپرولو په شرط پژواک ته وویل، د دولتي ځواکونو له خوا د شیخ علي ولسوالۍ له نیولو وروسته طالبانو له موټرسایکلونو او دولتي رینجرو په استفاده د سرخ پارسا ولسوالۍ ودانۍ پرېيښې ده.

د سرچینې په خبره، طالبان د ترکمن او سرخ درو ته تللي او له یو شمېر ولسي پاڅون کوونکو سره یې جګړه هم کړې ده.

سرچینې زیاته کړه چې دولتي ځواکونه د سرخ پارسا ولسوالۍ ودانۍ ته رسېدلي دي.

د پروان والي فضل الدین عیار هم د یو تصویري کلېپ په خپرولو د یادې ولسوالۍ بېرته نیول تایید کړي دي.

طالبانو تر اوسه په دې اړه څه نه دي ویلي.

د یادونې ده، تېره ورځ امنیتي ځواکونه توانېدلي وو چې د پروان شیخ علي ولسوالۍ له طالبانو ونیسي.

باید وویل شي چې طالبانو په تېرو دوو میاشتو کې د هېواد په بېلابېلو لایتونو کې شاوخوا ۱۹۰ ولسوالۍ نیولې دي.

په ورته وخت کې تېره ورځ ملي دفاع وزارت اعلان وکړ چې ۱۷ ولسوالۍ یې بېرته له طالبانو نیولې دي.