کابل (پژواک، ٣١ وږى ١٤٠٠): د پژواک موندنې ښيي چې د سرپل د فوايد عامې رياست له لوري د يوه ګرېډر لپاره يو هارن په داسې حال کې په ٦٠زره افغانۍ پېرل شوی چې په بازار کې يې نرخ ١٥٠٠ افغانى دى.
پژواک ځيني اسناد ترلاسه کړي چې له مخې يې په ١٣٩٩ کال کې د سرپل ولايت د فوايد عامې رياست له لوري د موټرو د ترميم په موخه ٩٠ قلمه توکي له بازاره پېرل شوي دي.
دغه ٩٠ قلمه د سرپل د فوايد عامې رياست له لوري په ٣،٢ ميليونه افغانۍ پېرل شوي خو د پژواک د څېړنو له مخې يې په بازار کې شاوخوا دوه ميليونه افغانۍ کېږي.
د ترلاسه شوو اسنادو له مخې، د سرپل ولايت د فوايد عامې رياست له لوري د يوه جاپاني ګرېډر يو کمپرېشني هارن په ٦٠زره افغانۍ اخيستل شوی، په داسې حال چې په بازار کې يې نرخ ١٥٠٠ افغانۍ دى.
همدارنګه دغه رياست د کراز ډمټرک د بريک يوه ډبه په ١٨زره افغانۍ پېرلې، په داسې حال چې په بازار کې يې بيه ٣٥٠٠ افغانۍ ده.
دغه راز د سوپر ماز د پايو يو بلبرينګ يې په ٢٤زره افغانۍ پېرلى، په داسې حال چې په بازار کې يې نرخ ١٥٠٠ افغانۍ دى.
پژواک له ياد ٩٠ قلمه توکو د بېلګې په توګه يواځې د ٢٩ قلمونو يادونه کوي چې په لاندې جدول کې ذکر شوي دي:
| شمېره | اندازه | د جنس نوم | د سرپل د فوايد عامې رياست بيه | د بازار بيه |
| 1 | یو عدد | د کوماز نيورسل | 30000 | 13300 |
| 2 | یو عدد | د کوماز ټانکر د هوا ويشوونکى | 15000 | 5000 |
| 3 | یو سېټ | د سوپرماز بشپړ ټايراډ | 30000 | 7600 |
| 4 | یو عدد | د سوپرماز د پايو بلبرينګ | 24000 | 1500 |
| 5 | یو سېټ | د کراز ډمټرک د هوا ماشين | 35000 | 12500 |
| 6 | یو سېټ | د کراز ډمټرک جک او انډل پايه | 15000 | 3500 |
| 7 | یو عدد | د کراز ډمټرک برېک ډبه | 18000 | 3500 |
| 8 | یو عدد | د ډمټرک د اشترينګ پمپ | 30000 | 9000 |
| 9 | یو سېټ | د سوپرماز د سيل واشل | 15000 | 2900 |
| 10 | یو سیت | د سوپرماز د استکيشن پيپ او واشلونه | 20000 | 6600 |
| 11 | یو عدد | د سوپر ماز باډۍ کوټکه | 4167 | 2700 |
| 12 | یو عدد | د سوپرماز د اکسلېټر راډ | 8000 | 3200 |
| 13 | یو عدد | د لوبيت کوماز د هوا ماشين | 25000 | 15000 |
| 14 | یو سیت | د لوبيت کوماز ټايراډ | 30000 | 3200 |
| 15 | یو سیت | د لوبيت کوماز د پشتم ګيلاس | 35000 | 29000 |
| 16 | یو سیت | د لوبيت کوماز رينګ | 30000 | 8000 |
| 17 | یو عدد | د لوبيت کوماز د برېک لېدر | 8000 | 1600 |
| 18 | یو عدد | د لوبيت کوماز د پايو پيکن | 5000 | 130 |
| 19 | یو عدد | د کوماز د پايو بلبرينګونه | 5000 | 1400 |
| 20 | یو عدد | د لوبيت کوماز د کيلومتر راډ | 5000 | 1800 |
| 21 | یو سیت | د جاپاني ګريډر کمپرېشني هارن | 60000 | 1500 |
| 22 | یو عدد | د چنايي لوډر سلف | 40000 | 30000 |
| 23 | یو سېټ | د مخکني کشک ګوټکې | 8000 | 2100 |
| 25 | یو عدد | د ټانکر کوماز د شا اينه | 2000 | 600 |
| 26 | یو عدد | د ټانکر کوماز دوه انچه والف | 15000 | 6500 |
| 27 | یو عدد | د ټانکر کوماز د اوبو زېرمه کولو ټانکر | 5000 | 2200 |
| 28 | یو عدد | د سوپرماز د کلچ ذغال | 10000 | 7000 |
| 29 | یو جوړه | د ډمټرک د باډۍ پېن | 6000 | 3500 |
دغه توکي په ۱۳۹۹ کال کې د سرپل ولايت د فوايد عامې رياست له لوري د یو تړون له مخې د سړکونو د حفظ او مراقبت ریاست لپاره د سخي ظاهر زاده شرکت په مرسته پېرل شوي دي.
د اخيستل شوو توکو د لېست په پاى کې د سرپل د فوايد عامې رييس انجنير حشمت الله، د محاسبې مدير سيد عيسى او د مالي امر صبورخان پوپل لاسليکونه هم کړي دي.
د سرپل د فوايد عامې ریاست یوې سرچینې پژواک ته وویل چې د وسایطو د ترمیم دغه قرارداد د دغه ریاست له لوري د سخي ظاهرزاده له شرکت سره شوى و.
سرچینه وایي، ياد شرکت دغه توکي د کرونا د لومړۍ څپۍ پر مهال اخيستي دي.
ده زياته کړه: ((د کرونا ویروس له امله د دغه ریاست رییس او مالي امر موټر چلوونکو ته ویلي وو چې تاسې قرنطین یاست او په کور کې پاتې شئ او خپل د حاضري مهر مو د بشري سرچينو امر ته ورکړئ تر څو تاسې حاضر کړي.))
دا وايي: ((له همدغه فرصته په استفادې يې مستريان راوستي، په موټرو کې يې لږ کار کړى او بيا موټر چلوونکو ته ويلي چې موټر مې درته ترميم کړي، ځيني موټر چلوونکي چې پرې پوه شوي، هغوی ته يې پېسې ورکړې څو غږ پورته نه کړي.))
سرچينې ادعا وکړه چې د موټرو د ترميم په نوم پيسې ايستل شوې، د فوايد عامې رييس، مالي امر او د شرکت رييس په خپلو منځو کې وېشلي دي.
ده وويل: ((کوم شيان چې اخيستل شوي هم دي، له بازار نه يې نرخ ډېر لوړ ليکل شوى چې دا ظلم دى.))
پژواک هڅه وکړه چې د اړوندې موضوع په اړه له موټر چلوونکو، د شرکت له مسوولينو، د بشري سرچينو له مسوول او مالي امر سره خبرې وکړي، خو د رييس له وېرې يو هم خبرو کولو ته حاضر نه شو.
خو د سرپل د فوايد عامې پخواني رييس انجنير حشمت الله پژواک ته وويل چې په دې اړه معلومات کوي او بيا يې جزئيات له پژواک سره شريکوي.
خو د څو ورځو په تېرېدو سره نوموړى خبرو کولو ته حاضر نه شو او دا مهال يې د ټيلېفون شمېره هم بنده کړې ده.
د يادونې ده، د تېرو پنځو اوونيو په اوږدو کې وسله والو طالبانو نږدې ټول هېواد نيولی او د پخواني حکومت ډېرى مشران يا بهر ته تللي او که په هېواد کې دننه هم دي، نو د ټيلېفون شمېرې يې بندې کړې دي.
پژواک د ډنمارک او د ملګرو ملتونو پراختيايي پروګرام (UNDP) په مالي مرسته دا راپور برابر کړی دی.
Visits: 1026
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن