د اروپا پارلمان، لس افغان ښځې یوې جایزې ته نوماندې کړې دي

کابل (پژواک، ۶ تله ۱۴۰۰): د مخکني حکومت د ځینو مسوولو ښځو په ګډون لس افغان مېرمنې د اروپا د پارلمان له خوا د “سخروف” په نوم د فکري ازادۍ جایزې ته نوماندې شوې دي.

د اروپا پارلمان تېره ورځ پر خپلې وېبپاڼه لیکلي چې د افغانستان د بشري حقونو خپلواک کمېسیون مشره شهرزاد اکبر، د میدان وردګو ولایت ښارواله ظریفه غفاري، د ښځو د حقونو فعاله ماري اکرمي، پلوشه حسن، میترا مهران، حوریه مصدق، فرشته کریم، د افغان فلم مشره صحرا کریمي، د بشري حقونو خپلواک کمېسیون مخکنۍ مشره سیما سمر، د سولې لپاره د مخکني حکومت د خبرو اترو ډلې غړې حبیبه سرابي او د سیاسي برخې خبریاله انیسه شهید یادې جایزې ته نوماند شوې دي.

سرچینې لیکلي چې د اروپا پارلمان هر کال د سخاروف جایزه هغو کسانو او ا دارو ته ورکوي چې له بشري حقونو او بنسټیزو آزادیو ملاتړ کوي.

سرچینې د اروپا د پارلمان د مرستیالې «هایدي هاوتالا» له قوله لیکلي چې دا افغان مېرمنې په خپل هېواد کې د مبارزې، بشري حقونو او دیموکراسۍ د دفاع لپاره د سخروف جایزې لپاره نوماندې شوې دي.

دا وايي: “د دغو ښځو مېړانه عالي ده. هغوی ځان له خطر سره مخ کړی، څو د هغه څه لپاره چې موږ ته ډالۍ شوې، مبارزه وکړي.”

د یادونې ده چې د یادې جایزې ګټونکي به د اکتوبر په ۲۱مه اعلان شي.

د یادو نوماندو ښځو له ډلې د افغان فلم لومړنۍ ښځینه مشرې صحرا کریمي پژواک خبري اژانس ته وویل، د دې لپاره چې تل یې غوښتي ترڅو د هنر او حرفې له مخې د ټولنې فکر بدل کړي، خوښه ده چې د اروپا د پارلمان له لوري یادې جایزې ته د نوماند شوو ښځو په ډله کې ده.

Views: 43