افغانستان د کرکټ درېیمه لوبه له نميبيا وګټله

کابل (پژواک، ۹ لړم ۱۴۰۰): د کرکټ نړیوال شل اووریز جام په سیالیو کې افغانستان په خپله درېيمه لوبه کې نميبيا ته د ۶۲ منډو په توپير سره ماتې ورکړه.

د کرکټ نړيوال جام شل اووريزې سيالۍ د تلې په ۲۵مه (د اکتوبر ۱۷مه) په عربي اماراتو کې د ١٢ غوره لوبډلو ترمنځ پيل شوې دي.

د نننۍ لوبې پچه افغانستان وګټله او د توپ وهنې پرېکړه یې وکړه.

افغانستان په ۲۰ اوورونو کې د ۵ لوبغاړو په سوځېدو ۱۶۰ منډې وکړې او سیالې لوبډلې ته یې ۱۶۱ منډو هدف وټاکه.

د افغانستان له لوري محمد شهزاد ۴۵ او حضرت الله ځاځي بيا ۳۳ ډېرې منډې وکړې.

په توپ اچونه کې د نميبيا له لوري بيا نوکل ليفتي-يتن او روبن ټريمپلمن دوه دوه وېکټې ترلاسه کړې.

نميبيا بيا په ۲۰ اوورونو کې د نهو لوبغاړو په سوځېدو سره ۹۹ منډې وکړې او له افغانستان څخه يې د ۶۲ منډو په توپير ماتې ومنله.

دغه راز په توپ اچونه کې افغان لوبغاړو حميد حسن ۳، نوین الحق ۳ او ګلبدين نايب بيا دوه وېکټې واخیستې.

له دې وړاندې افغانستان د کرکټ نړیوال شل اووریز جام په سیالیو کې خپله لومړۍ لوبه له سکاټلېنډ څخه ګټلې وه او دويمه لوبه يې د پاکستان پر وړاندې بايللې وه.

ټاکل شوې ده افغانستان د کرکټ نړیوال شل اووریز جام په سیالیو کې خپله څلورمه لوبه له هند سره وکړي.