هرات (پژواک، ۲ مرغومی ۱۴۰۰): د ګردي مېز ګډونوالو چې د پژواک خبري اژانس له خوا جوړ او د هرات له معراج راډيو خپور شو، سوله یې د رڼا دروازه وبلله او ټينګار يې وکړ چې سيمه ييزه سوله په هېواد کې د دوامداره سولې بنسټ کېداى شي.
د ۴۲ دقیقو دغه ګردی مېز د «سیمه ییزه سوله د دوامداره سولې بنسټ دی» تر سرلیک لاندې تېره ورځ سهار ۱۰ بجې له یادې راډیو خپور شو چې تکرار یې د ورځې لس بجې بیا خپرېږي.
په هرات کې ټولنپوهه او څېړونکې منیژه بهره په هېواد کې د جګړې درېدو ته خوښي څرګندوي او ټینګار کوي چې اوس د دې وخت رارسېدلی چې ټولنه د سولې پر ارزښت او د هغې د ساتنې په اړه پوه شي.
هغې زیاته کړه: «ټولنه باید هڅه وکړي چې لومړی سیمه ییزه سوله رامنځته کړي؛ ځکه سیمه ییزه سوله په ټول هېواد کې د دوامداره سولې بنسټ دی.»
هغه زیاته کړه، «د کورنۍ غړي له هغو کسانو دي چې کولای شي د تاوتریخوالي په کمولو کې مهم رول ولوبوي.»
منیژه د خپلو حقونو په اړه د کورنیو د پوهاوي نشتوالی د کورني تاوتریخوالي د زیاتېدو یوازېنی لامل بولي او ټینګار کوي چې د دې ستونزو د له منځه وړو لپاره باید د رسنیو له لارې د ټولنې په کچه د عامه پوهاوي پروګرامونه وړاندې شي.
په ورته مهال د دغه پروګرام بلې ګډونوالې او حقوق پوهې حفيظې امين د سولې کلمې ته د اسلام له نظره اشاره وکړه او ټينګار يې وکړ چې سوله، ارامي او امنيت د خداى (ج) له سترو او کليدي نعمتونو دي چې په سيوري کې یې انسانان او ټولنې کمال ته رسیږي او د اسلامي نصوصو له مخې، سوله هغه لاره ده چې د رڼا او روښانتیا لامل کیږي.
د مېرمن امین په خبره، سوله او امنیت د اسلامي دین له مهمو او ارزښتناکو مفاهیمو دي او دومره مهم دي چې د خدای (ج) له صفاتو او نومونو یو هم «امنیت او سوله» دی.
د یاد ګردي مېز بله مېلمنه ترنم خدابخشي وایي چې په ځینو ټولنیزو، رسمي او دوه په دوه مناسباتو کې تبعیضي، ستمګرانه، غیرعادلانه، او یو طرفه خبرې، د سولې ضد پر یوه پېښه بدلې شوې چې سوله له ګواښ سره مخ کوي او یا یې له منځه وړي چې له دې سره وېره رامنځته کېږي.
د معلولينو د حقونو يو فعال او د پروګرام مېلمه ميرويس کريمي چې کورنۍ يې د تېرو جګړو او تاوتريخوالي قرباني شوې، وايي چې د نوي حکومت په راتګ سره وژنې درېدلې، خو د کار له نشتوالي او بېوزلۍ شکايت کوي.
دى وايي، که د کار زمینه برابره نه شي او بېوزلي له ټولنې ورکه نه شي، تاوتريخوالى به نور هم زيات شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن