د امريکا پرمختايي اداره ننګرهار کې د ميوو باغونه جوړوي

جلال اباد (پژواک، ۲ سلواغه ۱۴۰۰): د ننګرهار د کرنې رياست چارواکي وايي، د امريکا پرمختايي اداره غواړي چې راتلونکی پسرلی په دغه ولايت کې د مختلفو میوو باغونه جوړ کړي.

چارواکي وايي چې دغه باغونه هغو کروندګرو ته جوړېږي چې له يوه تر پنځو جريبه ځمکه ولري.

د ننګرهار د کرنې رياست وياند اجمل سبحاني وايي، په ننګرهار کې د USAID په مالي لګښت د بېلابېل ډوله ميوو باغونه جوړېږي.

دی زياتوي چې کروندګرو ته به د هغوی په خوښه د لیمو، مالټو، نارنج، ناک، شفتالو، انار ، الوچې، ګیلاس  او مڼو باغونه جوړ شي.

د ده په خبره، هغه کروندګر چې له يوه تر پنځو جريبه ځمکه ولري او د ننګرهار په ۲۲ ولسوالیو او مرکز جلال اباد کې وي کولای شي له دغې چارې برخمن شي.

د کرنې رياست وياند وايي، دغه باغونه به په وړيا ډول جوړېږي او پر نيالګيو سربېره به اړوند نور وسايل او اړين مواد هم ورکول کېږي.

دی وايي، چې ټولو ولسواليو کې کروندګرو ته خبر ورکړل شوی، نوم ليکنه يې روانه ده چې له ټاکلې مودې وروسته به يې عرض پاڼې له اړوندې ادارې سره شريکې او اقدامات به ترسره شي.

د ننګرهار کروندګر هم خوښ دي چې دا ډول پروژه په دغه ولايت کې پلې کېږي خو غوښتنه يې داده چې بايد پروژه په شفافيت ترسره شي.

قسيم الله چې د ننګرهار سره رود ولسوالۍ کې يې کروندې دي وايي تېر کې يې هم د شفتالو باغونه جوړ کړي او پلان لري چې د دغې نوې پروژې له لارې د مالټو باغونه جوړ کړي.

د اقتصادي چارو کارپوهان په دې باور دي چې د باغونو جوړونه په يوه وخت کې د ميوې او سبزيجاتو حاصلات ورکوي چې ګټه يې ډېره او حاصلات يې لوړ وي.

د پوهنتون استاد او د اقتصادي چارو کارپوه محمد امين ستانکزي پژواک ته وويل: ((ننګرهار کې اب و هوا ښه ده، هر وخت په کې حاصلات کېږي، خو دا چې ځمکې يې کمې دي نو باغونه ځکه ګټور تمامېږي چې خلکو ته په کې د کار زمينه هم برابرېږي.))

هغه زياته کړه چې د باغونو جوړول يو هېواد د پرديو له احتياجه هم خلاصولی شي.

د يادونې ده چې په ننګرهار کې دا اوس هم پر زرګونه جريبه دولتي او خصوصي ځمکه د مالټو، نارنجو، ليمو او شفتالو باغونه جوړ شوي دي.