په کندهار ښار کې د «ابادي» په نوم پروژه کې ۸۴۰ کسانو ته د کار زمینه برابره شوې ده

کندهار (پژواک، ۱۱ وری ۱۴۰۱): په کندهار ښار کې د ملګرو ملتونو د بشر مېشتېدنې پروګرام/  UN-Habitat له خوا د «ابادي» په نوم پروژه کې ۸۴۰ کسانو ته د کار زمینه برابره شوې ده.

دغه کسان د نیالګیو په روزلو، چریو پاکولو، ګلدانونو جوړولو او نورو برخو کې کار کوي.

د کندهار ښاروالۍ اړوند د تنظیف او سرسبزۍ مدیر حبیب الله بشردوست پژواک خبري اژانس ته وویل، د ملګرو ملتونو د بشر مېشتېدنې پروګرام د کندهار له ښاروالۍ سره په ګډه د ابادي په نوم پروژه پیل کړې چې د ښار د ۸۴ ګذرونو ۸۴۰ کسان په کې په کار ګومارل شوي دي.

هغه زیاته کړه، دا میاشتنۍ پروژه ده چې هره ورځ هر کارکوونکي ته د کار په بدل کې ۵۰۰ افغانۍ ورکول کېږي.

دی وايي، د دې پروژې له مخې، له یوې خوا د کندهار ښار د سرسبزۍ او تنظیف چارې ترسره کېږي او له بلې خوا د ښار سلګونو بېوزلو وګړو ته زمینه برابرېږي چې خپلې کورنۍ ته نفقه برابره کړي.

هغه دغه راز یادونه وکړه چې د ملګرو ملتونو د خوړو نړیوال سازمان/  WFPله خوا هم د کندهار ښار د عمومي پاتاو (کانال) پاکولو ۶ میاشتنۍ پروژه دوام لري چې ۶۰۰ کسان په کې په کار بوخت دي.

ده وویل، د دې پروژې درې میاشتې تېرې شوې او درې نورې یې پاتې دي چې هره میاشت هر کارګر ته ۷۱۰۰ افغانۍ ورکول کېږي.

دی وايي، پلان لري د مرستندویه ادارو په ملاتړ ورته نورې پروژې هم پیل کړي څو له یوې خوا خلکو ته اسانتیاوې برابرې شي او له بلې خوا بېوزلو کسانو ته کار وموندل شي.

د یادو دواړو پروژو کارګر وايي، خوښ دي چې د خپل ښار په پاکوالي او سمسورتیا کې برخه اخلي او له دې لارې خپلو کورنیو ته نفقه هم برابروي.

د کندهار ښار اوسېدونکي عبدالجلیل پژواک خبري اژانس ته وویل، د کندهار له ښاروالۍ سره د سرسبزۍ په برخه کې کار کوي او هره ورځ ۵۰۰ افغانۍ ورکول کېږي.

هغه زیاته کړه، دا کار په ډېره لېوالتیا کوي او هیله یې دا ده چې همداسې دوام پیدا کړي.

نصیراحمد د کندهار ښار بل اوسېدونکی دی چې د عمومي پاتاو یا کانال پاکولو په پروژه کې په کار بوخت دی.

ده پژواک ته وویل، له تېرو درېیو میاشتو راهیسې له سلګونو نورو کسانو سره یو ځای په دې برخه کې کار کوي.

دی هم خوښ دی چې له دغه کار څخه هم پيسې ترلاسه کوي او هم خپل ښار پاکوي.

نوموړی هم له حکومت او مرستندویه ادارو غواړي چې د دوی لپاره د اوږدمهالي کار زمینه برابره کړي.

چارواکي وايي، هڅه کوي د مرستندویه ادارو په مرسته داسې پروژې ډیزاین او عملي کړي چې هم خلکو ته خدمات وړاندې شي او هم اړو کسانو ته د کار زمینه برابره شي.