د جلال اباد اوسېدونکي: مارکېټونو کې د موټرو تمځای نشتوالي ښار کې ګڼه ګوڼه ډېره کړې

جلال اباد (پژواک، ۲۱ وری ۱۴۰۱): د ننګرهار مرکز جلال اباد اوسېدونکي وايي، په تېر نظام کې د ښاروالۍ  مسوولينو بې غورۍ له امله لوړپوړيزو تجارتي ودانیو کې د موټرو تمځایونه نه دي جوړ شوي چې دې چارې په ښار کې ګڼه ګوڼه زیاته کړې ده.

ښاريان وايي، د اصولو له مخې د مارکېټونو په تکاویو کې بايد د موټرو لپاره تمځايونه جوړ شي.

د جلال اباد ښار اوسېدونکی عتيق الله احمدزی وايي، تېر څو کلونه په ښار کې ډېرې لوړپوړيزې ودانۍ جوړې شوې چې ښار ته يې ښکلا ورکړې؛ خو د نقشو ناسم تطبيق يې ګڼه ګوڼه ډېره کړې ده.

هغه زياته کړه، په ټولو ښارونو کې د لويو سوداګريزو ودانيو او مارکېټونو تمځايونه بايد په تکاوېو کې وي؛ خو دلته ټولو کې دوکانونه جوړ شوي.

د ښار يو بل اوسېدونکي جهانباز هم پژواک سره خبرو کې نيوکه وکړه چې د تېر نظام د ښاروالۍ مسوولينو او مامورينو له مارکېټ لرونکو د پيسو په اخیستلو اجازه ورکړې چې تکاویو کې د پارکېنګ پرځای سوداګريزې ساحې او هټۍ جوړې کړي.

دا يواځې عام خلک نه دي چې د دې ستونزې پړه د وخت پر اړوندو چارواکو اچوي؛ بلکې مدني فعالان هم ورته نظر لري.

مدني فعال حیات الله حميدي وايي؛ تېر کې د ښاروالۍ مامورينو د پيسو په بدل مارکيټ لرونکو ته اجازه ورکړې چې د موټرو د تمځای پرځای ځمکتلو/تکاویو کې هټۍ جوړې کړي.

د جلال اباد ښاروالۍ مسوولين هم په تېر نظام کې د فساد شتوالی د دې ستونزې یو لامل بولي.

د ښاروالۍ وياند بختي جان مراد وایي، پر دې خبرې روانې دي چې څنګه په دغو مارکېټونو کې د موټرو لپاره تمځايونه جوړ شي.

د يادونې ده، تر دې وړاندې هم د جلال اباد ښاريانو په ښار کې له ګڼې ګوڼې شکايتونه کړي او له حکومتي مسوولينو يې غوښتنه کړې وه چې يوه حل لاره ورته پيدا کړي.