[restrict paid=”true”]
کابل (پژواک، ۳۰ وری ۱۴۰۱) : د سرپرست حکومت د کابینې په غونډه کې اړوندو ادارو ته دنده وسپارل شوه چې په کابل ښار کې د فقر او سوالګرو د زیاتوالي عوامل پیدا او د حل لپاره یې لازم اقدامات وکړي.
د باختر دولتي اژانس د راپور له مخې، د سرپرست حکومت د رییس الوزرا ملا محمد حسن اخند په مشرۍ او د ریاست الوزرا د مرستیالانو او سرپرست وزیرانو په ګډون د کابینې غونډه جوړه شوه.
سرچینې زیاته کړې، د غونډې په پیل کې د بېلابېلو موضوعاتو په اړه د ټاکل شویو پلاوو کاري راپورونه وړاندې شول او له مخې یې اړوندو ادارو ته لازمې سپارښتنې وشوې.
همدارنګه د کابینې په غونډه کې، په کابل ښار کې د فقر او سوالګرو د زیاتوالي پر عواملو بحث وشو او د دې ستونزې د حل لپاره د کار او ټولنیزو چارو او کورنیو چارو وزارتونو او دغه راز افغاني سرې میاشتې ادارې ته دنده وسپارل شوه چې دغه موضوع وڅېړي او د حل لپاره یې لازم اقدامات وکړي.
دغه راز په غونډه کې له هېواده له ناقانونه او قاچاقي لارو د خلکو تګ او له ایران سره پر پوله د خلکو د ناوړه وضعیت موضوع هم وڅېړل شوه او د څېړنې لپاره یې اړوندو ادارو ته مسوولیت وسپارل شو.
په راپور کې راغلي، لویې څارنوالۍ ته دنده وسپارل شوه چې په ایران کې د بندي افغانانو د پوښتنې او د امکان په صورت کې د بندیانو د استرداد موضوع لپاره یاد هېواد ته سفر وکړي.
د غونډې په پای کې پر نورو موضوعاتو هم بحث وشو او لازمې پرېکړې وشوې.
[/restrict]
Views: 910
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن