کندهار (پژواک، ۶ غبرګولی ۱۴۰۱) د کندهار د برېښنا ریاست وایي چې یو کارکوونکی یې د هلمند سنګین ولسوالۍ د برښنا غځولو پر مهال ژوند له لاسه ورکړی دی.
د کندهار برښنا ریاست لخوا په یوه خپره شوې خبریاڼه کې ویل شوي، دا پېښه نن د جمعې په ورځ شاوخوا ۱۱ بجې رامنځ ته شوې ده.
سرچینې زیاته کړې : «د کندهار حوزې برېښنا ریاست فني کارمند او د لومړي جنکشن آمر حامید د سنګین ولسوالۍ ساروان کلا په سیمه کې د کجکي نوي لاین د غځولو په جریان کې په شهادت رسېدلی دی.»
د حامد د کورنۍ غړي هم وایي، هغه د کجکي او کندهار تر منځ د برېښنا د نوي لاین د ترمیم پر مهال خپل ژوند له لاسه ورکړی.
د حامد د کورنۍ دغه غړي چې خپل نوم نه یادوي پژواک خبري اژانس ته وویل، حامد د هلمند د سنګین ولسوالۍ د ګرم اب غره کې د برېښنا له لویي پایې څخه را لوېدلی وو چې وروسته یې خپل ژوند له لاسه ورکړ.
ده زیاته کړه: «حامد د نورو کارکوونکو سره هلمند ته تللی وو د بريښنا له لويي خادې څخه رالوېدلی چې له بده مرغه ژوند یې له لاسه ورکړی وو، له هغه څخه اوس پنځه اولادونه پاتي دي.»
دی وایي، حامد د خپلي کورنۍ یوازنی سرپرست وو او داسي غټ اولاد نه لري چې د کورنۍ سرپرستي وکړي او کورنۍ وساتي.
د یادونې وړ ده چې له کجکي څخه تر کندهار پورې دا مهال د برېښنا د نوي لاین د ترمیم چارې روانې دي چې له امله یې پر کندهار او هلمند برېښنا هم له تیري شاوخوا یوې اونۍ راهیسي بنده شوې ده. د دغه لاین د ترمیم پر مهال په تیرو وختونو کې هم د برېښنا کارکوونکو د جګړې، ماین چاودنو او نورو پېښو له امله ژوند له لاسه ورکړی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن